Glydel Mercado humagulgol dahil sa comment ng fans

Naging emosyonal ang magaling na aktres na si Glydel Mercado nang mabasa niya online ang mga papuri sa kanya ng mga viewer ng GMA primetime series na “My Husband’s Lover” kung saan ay gumaganap siya bilang Sandra Agatep, ang martir ngunit palaban din na ina ng leading lady na si Lally (Carla Abellana).
 
Sa isang panayam kay Glydel sa set ng “My Husband’s Lover,” na-overwhelm siya sa dami ng mga magagandang feedback na narereceive niya online dahil sa kanyang papel sa “My Husband’s Lover.”
 
Ayon pa kay Glydel, bagamat hindi siya masyadong techy at active sa social media, nakakarating sa kanya ang mga comment ng viewers ng kontrobersyal na serye.  Nang basahin namin ang ilan sa mga papuri sa kanya na pinost ng mga netizens sa Twitter, hindi na napigilan ni Glydel ang maluha. 
 
Ayon kay Glydel, wala na raw sasarap pa sa papuri ng mga manood. Ito raw ang nagpapasulit sa kaniyang pagod at pagpupuyat sa set.
 
Inamin ng aktres na hindi niya inakalang hahangaan siya sa kanyang role sa “My Husband’s Lover” at hindi rin niya inasahang magiging maingay ang nasabing palabas lalo na’t medyo sensetibo ang tema nito.
 
Ang “My Husband’s Lover” ay kuwento ng isang asawa na nagngangalang Lally (Carla Abellana) na nabuntis at pinakasalan ng isang closet gay, si Vincent (Tom Rodriguez). Noong una ay itinatanggi ni Vincent sa kanyang sarili na siya ay gay ngunit nang biglang magbalik ang kaniyang gay lover noong high school na si Eric (Dennis Trillo), nagbalik rin ang apoy ng pag-ibig na nakaraan.  Gumulo ang matiwasay na buhay ng pamilya nina Vincent at Lally nang pumasok sa eksena si Eric. Isang gabi, sa pag-aakalang may kalukadidang na babae ang kanyang asawa, sinundan ni Lally si Vincent sa isang condo unit at nang buksan niya ang pinto nito, bumulaga sa kanya ang paghahalikan nina Vincent at Eric. Hinimatay si Lally nang malamang ang kalukadidang ng kanyang asawa ay lalaki rin!
 
Tinanong namin si Glydel kung alin sa kanyang mga eksena ang masasabi niyang espesyal sa kaniya.  Sabi ng aktres, ang mga unang eksena niya sa unang linggo ng “My Husband’s Lover” ang hindi niya malilimutan. 
 
Punung-puno ng drama ang nasabing mga eksena na naka-sentro sa pamilya ni Sandra, na iniwan ng kanyang asawa dahil sumama ito sa kanyang kabit. Mag-isang tinaguyod ni Sandra ang kanyang dalawang anak na babae – si Lally (Carla Abellana) at si Evelyn (Karel Marquez).
 
Sa kagustuhang mapagtapos sa pag-aaral ang kaniyang mga dalaga, napilitan si Sandra na ilako ang sarili sa kung sinu-sinong lalaki. Nang malaman ito ni Evelyn ay nag-rebelde ito at nag-layas.  Hindi nagtagal ay nakipag-tanan ito sa kanyang boyfriend at nabuntis.
 
Si Lally na lang sana ang inaasahan ni Sandra na makakapagtapos ng pag-aaral ngunit mauunsiyami ito dahil nabuntis siya ni Vincent.
 
Parang sinakluban ng langit at lupa si Sandra dahil sa sunod-sunod na kamalasan sa kanyang buhay pamilya.  Nadagdagan pa ito nang malaman niya na ang napangasawa ni Lally ay bakla pala.
 
Sa gitna ng mga kamalasang ito, may suwerte pa kayang aasahan si Sandra?
 
Panoorin ang malapit nang magtapos na “My Husband’s Lover” gabi-gabi sa GMA Telebabad.
 
Para sa karagdagang impormasyon tungkol sa programa, i-like ito sa Facebook (www.facebook.com/myhusbandslover) at i-follow ang @myhusbandslover sa Twitter.
 
- Neil Celeste T. Rara, GMA Social Media