Pilot episodes ng Dormitoryo, Prinsesa ng Buhay Ko at Kahit Nasaan Ka Man, pinag-usapan sa Twitter!


 

 

Sunod-sunod ang paghain ng Kapuso Network ng mga bagong programang patok sa panlasa ng viewers. Noong nakaraang Linggo, inilunsad ng GMA ang Dormitoryo, isang weekly teen drama, at sinundan ito ng mga teleseryeng Prinsesa ng Buhay Ko at Kahit Nasaan Ka Man noong Lunes (September 23).

Ang tatlong programa ay nag-trend sa social networking site na Twitter sa oras na sumahimpapawid ang mga ito. Nagtrend ang #DormitoryoPilotEpisode sa top 5 spot. Pinapurihan ng mga netizen ang misteryosong storyline at maging sila ay napaisip kung anung lihim nga ang itinatago ng dormitoryong Holy Spirit Manor.

Bukod sa kakaibang tema ay pinapurihan din ng netizens ang pagganap nina Lauren Young, Wynwyn Marquez, Joyce Ching, Enzo Pineda at Ruru Madrid sa bago nilang programa.  

Ang Prinsesa ng Buhay Ko naman ang pinakaaabangang pagbabalik telebisyon ng loveteam na “Al-Kris” kaya’t agad nag-trend ang #PrinsesangBuhayKo at #GMAPrinsesaPilot sa top 2 at 5 spots sa Twitter world noong Lunes. Kinilig ang lahat sa tambalang Aljur Abrenica at Kris Bernal na talagang na-miss ng fans. Nariyang matuwa sila sa kulitan scenes at paminsan-minsan nama’y kinurot ang kanilang puso sa mga eksena sa ampunan.

Na-flood naman ng #KahitNasaanKaManPilot ang Twitter feeds hindi lang dito sa Pilipinas kundi sa buong mundo! Nag-trend ito sa top 4 spot sa Pilipinas at top 5 naman Worldwide last Monday. Salamat sa mga fans nina Julie Anne San Jose at Kristoffer Martin na naging sobrang supportive sa first primetime lead roles ng kanilang mga idolo. Paniguradong susundan ng lahat ang istorya nina Pauleen (Julie Anne) at Leandro (Kristoffer) kung paano nga ba sila pagtatagpuin muli ng tadhana.

Para makita ang ilang kumento sa pilot episodes ng mga nabanggit na programa, i-follow lang ang official Twitter accounts na @GMADormitoryo, @GMAPrinsesa at @GMANasaanKaMan.

Simula pa lang ‘yan! Patuloy na subaybayan ang Dormitoryo tuwing Linggo pagkatapos ng Sunday All Stars at gabi-gabi naman sa Telebabad ang Prinsesa ng Buhay Ko at Kahit Nasaan Ka Man.

- CJ Mendoza, Social Media Specialist