Ibinasura ng Makati Judge Andres Soriano ang mosyon ng Department of Justice na ipaaresto si Senador Antonio Trillanes IV kaugnay ng kasong kudeta na kinaharap ng huli noong 2003 dahil Oakwood Mutiny pero nabasura na noong 2011.
Sa inilabas na 33-pahinang resolusyon ni Soriano nitong Lunes, nagpasya ang hukom na ibasura ng mosyon ng DOJ sa katwiran na, "no reason to disturb the doctrine of immutability of a final and executory judgment."
Ibinasura ang kasong kudeta laban kay Trillanes noong 2011 matapos na mabigyan ng amnestiya sa ilalim ng administrasyong Aquino.
"Meanwhile, the law is vibrant. Jurisprudence is its lifeblood. Subsequent jurisprudence may forge new horizons in which exceptions to the immutability of a final and executory judgment may be born," paliwanag ni Soriano sa resolusyon.
Acting Prosecutor General Richard Fadullon confirms Makati RTC Br 148 denies DOJ motion to arrest Trillanes, but upholds Proclamation 572; Fadullon qualifies he has yet to see actual resolution, decision was information relayed to him @gmanews
— Dano Tingcungco (@danotingcungco) October 22, 2018
"For now, the Court finds itself powerless to disturb the said doctrine even if it had sustained the factual bases for the issuance of Proclamation No. 572," patungkol sa kautusan na inilabas ni Pangulong Rodrigo Duterte na nagpapawalang-bisa sa amnestiya ni Trillanes noong nakaraang buwan.
Bagaman inayunan ng hukom ang depensa ni Trillanes na sinunod niya ang mga nakasaad sa pagkuha niya ng amnestiya, wala naman daw nakitang basehan si Soriano na sabihing may nilabag na batas ang Proclamation No. 572.
Nakabinbin ngayon sa Korte Suprema ang petisyon na kumukuwestiyon sa legalidad ng naturang proklamasyon.
Ikinalugod ni Trillanes ang desisyon ng korte, bagaman inaasahan umano niya na magpapatuloy umano ang gagawing panggigipit sa kaniya ng administrasyon. — FRJ, GMA News
