Umani ng batikos sa ilang mga estudyante at sa mga netizens ang isang security guard matapos umano nitong paluin ang isang matandang pulubi sa Malate.
Nakunan ng video ang pakikipagtalo ng ilang estudyante sa naturang guwardiya at ito's mabilis na naging viral.
Ayon sa ulat ni Dano Tingcungco sa "24 Oras", kuha ang video sa bahagi ng Philippine Women's University (PWU) sa Malvar St., Malate, Maynila noong nakaraang Biyernes.
Hindi nakita sa video pero pinalo umano ng guwardiya.
“Kinuha niya 'yung pamalo niya tapos hinataw po niya sa matanda… sa may tuhod po…Doon na po ako lumapit, tapos inawat ko 'yung lalaki. Tinanong ko, bakit niya hinataw?" kwento ng estudyanteng kumuha ng video na tumangging ipakilala.
"Matanda 'yan oh. Tingnan mo oh. Wala namang ginagawa, 'wag mong paluin," maririnig na sinasabi ng estudyante sa video.
“Marunong pala kayo eh, 'di kayo magpaalis," sagot ng guwardiya.
"'Wag kang manakit. Ikaw nga 'yung mayabang diyan, ikaw 'yung nananakit," sabi ng estudyante.
Ayon sa pamunuan ng PWU, sinuspende na raw ng security agency ang naturang guwardiya habang iniimbestigahan ang insidente.
"PWU does not condone any kind of behavior relating to violence," sabi ng director ng Medie Center ng paaralan na si Pia Labrador.
"The sidewalk is supposed to be a walkway, and I think my understanding was the homeless person was lying across the sidewalk.. I’m assuming the part of the job of the security guard is to clear the walkway.”
Sinisikap pang makuha ang pahayag ng guwardiya.
Ayon sa kanyang agency, umamin daw ang guwardiya na nadala siya ng kanyang emosyon. —Joviland Rita/NB, GMA News
