Kabilang umano ang mga barista at bartender sa mga trabaho na pangunahing kailangan sa ibang bansa. Katunayan, mahigit 100 baristang Pinoy at mahigit 300 bartender ang kailangan daw ngayon sa Bahrain.
Bilang paghahanda na makapagtrabaho sa ibang bansa, o kahit sa Pilipinas, marami umano ang kumukuha ng kursong barista at bartender sa mga accredited school ng TESDA, ayon sa ulat ni JP Soriano sa GMA News "24 Oras" nitong Miyerkoles.
Si Lloyd Pecolados, na isang barista student, target na makapag-abroad dahil malaki raw ang sahod.
"Ang advantage po kasi 'pag nagtatrabaho sa ibang bansa, first 'yung salary kasi sa ibang bansa 'yung sasahurin mo dito mas dodoble, mas triple du'n," saad niya.
Ayon sa Philippine Overseas Employment Administration, maraming baristang Pinoy na ang naipadala sa Bahrain, Qatar, Saudi Arabia at Singapore.
Nangangailan daw muli ang Bahrain ng dagdag na mga barista at bartender na ang sahod kada buwan ay puwedeng umabot sa P50,000 hanggang P60,000.
"Meron kaming nasa Maldives, nasa Cayman Island normally. Marami po kami sa Qatar, Dubai, Middle East marami pong barista diyan," sabi ni Deejae Juantahu, president, CFB (Tesda accredited school) .
Sabi ni Jocelyn Sanchez ,Deputy Administrator, POEA, "Hindi lang naman pine-prepare nila for overseas employment, local din, local employment and of course. On top dito 'yung Department of Labor and Employment."
Kasama umano sa top 20 in demand jobs sa Pilipinas ang pagiging barista.
Para sa mga interesadong magtrabaho sa ibang bansa bilang mga barista at bartender, maaaring tingnan sa website ng POEA ang job orders.
Paalala lang, mag-ingat sa mga illegal recruiter.-- FRJ, GMA News
