Filtered By: Pinoyabroad
Pinoy Abroad

Kongresista nagulat sa kalagayan ng mga distressed OFW sa KSA


“Worst than we thought." Ganito inilarawan ni Akbayan party-list Rep. Walden Bello ang problema ng mga nagigipit na overseas Filipino workers (OFWs) sa Kingdom of Saudi Arabia particular ang mga domestic helper. Ang pahayag ay ginawa ni Bello matapos bumisita kamakailan sa KSA kasama ang ilang miyembro ng House committee on overseas Filipino. Kasama sa pinuntahan ng mga mambabatas ay lugar kung saan pansamantalang tumutuloy ang mga distressed OFWs. Tiniyak ng kongresista na kaagad na kikilos ang komite na kanyang pinamumunuan batay sa sitwasyon at mga problema na kanilang nakita sa ginawang pagtungo sa KSA. Kabilang umano sa dapat pagtuunan ng pansin ay paghanap ng paraan upang mapahusay ang pagpapadala ng mga manggagawa sa nabanggit na bansa lalo na ang mga household service worker. “If it means a ban, we need to discuss that or if it means something more informal like not accrediting the Saudi government," aniya. “But yung urgency of doing that is very clear dahil nakita talaga namin na there is a very vulnerable condition, rape, maltreatment as we said the realization was worst than we thought here." Kasama ni Bello sa KSA sina Reps. Cresente Paez, Emmeline Aglipay, at Ma. Carmen Zamora-Apsay. Nagsilbing tagapayo ng grupo sa usapin ng OFW si Ellen Sana, opisyal ng Center for Migrant Advocacy. Sa kabila ng ilang pagpuna sa kanilang biyahe, sinabi ni Bello na marami silang napagtagumpayan lalo na’t nakita nila ang aktuwal at malalim na problema ng mga distressed OFWs. Ang mga nakita at natuklasan umano ng mga mambabatas sa pagbisita sa KSA ay magagamit nila sa paggawa ng mga kinakailangang panukalang batas sa Kongreso para sa kapakanan ng mga OFW. Ilan sa mga dapat umanong gawin ay pahusayin ang Pre-departure orientation seminar, at pagtatayo ng shelter para sa mga ipinapadeport na OFW. Idinagdag niya na sinisikap ng mga opisyales sa bansa na makakuha ng pondo para mapauwi ang mga distressed OFW. Nakita umano niya ang turnover sa Bahay-Kalinga na marami na rin naman ang napapauwing kababayan. “Ang commitment namin dito sa aming lakad is to be able to look at other sources of funding within the government para maka-create tayo ng pondo para makauwi ang ating mga workers," pahayag niya. Magkaroon ng resulta Ilan sa mga lugar na binisita ng mga mambabatas ay ang Bahay-Kalinga sa Riyadh na tinutuluyan ng mga nagigipit na OFWs. Pinuntahan din nila ang tinatawag na “safe house" na Khandara Bridge na nasa loob ng Hajj Seaport Terminal. Nakausap din ng mga kongresista ang mga distressed OFWs na nasa Filipino Workers Resource Center sa loob ng konsulado sa Jeddah. Nakipagpulong din sila sa mga lider ng iba’t ibang organisasyon kung saan inusisa ang ginawa nilang pagpunta sa kaharian. Ayon kay Jauhari Usman, ng Western Region Chapter Commander ng Order of the Knights of Rizal, hindi na bago sa kanila ang pagpunta ng mga mambabatas at nagsasagawa imbestigasyon sa mga problema ng OFWs. Ngunit sakabila ng paulit-ulit na pagbisita sa kanila, nananatili umano at tila walang nagiging solusyon sa mga problema. Nagpaliwanag naman si Bello tungkol sa naging usapin na hindi umano kasamang inimbitahan sa pulong ang militanteng grupo ng Migrante. “Naimbita sila (Migrante). Sinabi sa akin ng ating mga opisyal sa Riyadh na sila ay naimbitahan at ako’y nagpapasalamat na sila ay naroroon sa pulong," ayon sa kongresista Bello. Idinagdag ni Bello na nabigyan sila ng kopya ng report ng mga naunang miyembro ng komite na nagtungo sa KSA noong 2009 na pinangunahan ni Rep Rufuz Rodriguez. Sinabi ni Bello na malakas ng rekomendasyon nila para sa isulong ang Bilateral Labor Agreement sa mga bansang katulad ng Saudi Arabia. “That was a very important outcome of the trip that we should not rest until we get the BLA and we are committed to proceed that," aniya. - Ronald Concha, GMANews.TV

LOADING CONTENT