Kwentong Kapuso: Liwanag ng Pilipinas

Maswerte nga bang maituturing, sa ibang bansa’y makipagsapalaran?

Malaki nga ang kikitain, subalit kapalit nama’y kalungkutan

Mga mahal mo sa buhay, sapilitan mong iiwanan

Mamanhidin ang puso, upang sakit ‘di mamalayan

 

Magpuyat, malipasan ng gutom, ay ‘di alintana

Magbabad sa init at alikabok, ay tila nakasanayan na

Pagod na sa paglalakad, ay sige pa rin ang arangkada

Tagaktak na ang pawis, pati damit ay lapot na

 

Pagod man ang katawan, sa maghapong pagta-trabaho

Pag dating sa inuupaha’y, maglalalaba pa’t magluluto

Lilinisin ang sahig, kikiskisin ang inyodoro

Mga gawaing para kay Yaya, sa kinamulatan kong mundo

 

Minsan sa pag tulog, sa kapagura’y humaharok

Nakakahiya mang aminin, sa kabilang kwarto’y umaabot

Sana’y pagpasensyahan na lang, ng mga kasamahang natutulog

Pagkat ako man minsan di’y, harok nila ang pampatulog

 

Kapagurang nadarama’y, agad din namang napapawi

Pagdating ng katapusan, ako din nama’y ngumingisi

Sweldong inaasam, sa mga palad lang ay darampi

Pagkat ilang segundo lang, naipadala na sa mga kalahi

 

Pakiramda’y gumagaan, kapag sweldo’y naipadala na

Pagtulong sa kapamilya, hatid sa aki’y ligaya

Puso ko’y nagagalak, sa tuwing matatanggap nila

Mumunting kong handog, isang malaking pagpapala

 

Subalit nandiriyan pa rin, mga sandaling namimighati

Pusong manhid ay nagkakamalay, nararamdaman ang sakit

Nagbibingi-bingihan na ang taynga, patuloy ko pa ring naririnig

Pangungulila ng puso ko’y isinasambulat ng kanyang pintig

 

Hanggang kalian magtitiis, malulumbay, malulungkot?

Hanggang kalian luluha, mananangis, mababagot?

Ito ang buhay kong pinili, mangibang bansa’t pumalaot

Kaya’t dapat ko lamang tatagan, ang damdaming nanghihilakbot

 

Konting tulog na lang, ako’y makakauwi din

Sa kinamulatang bansa, doo’y mahihimbing

Hindi pa man sa ngayon, batid kong araw din ay darating

Makakapiling kong muli, silang mga mahal sa akin

 

Panginoon ko’t Diyos ko, dalangin ko’y Iyong dinggin

Pagkalooban Mo po ng lakas, mga katulad kong naninimdim

Dito sa ibayong dagat, ilayo Mo po kami sa dilim

Upang Liwanag ng Pilipinas, ay muli naming makapiling. - Gilson Aceveda