Filtered By: Topstories
News

Lapu-Lapu City mihandum sa Battle of Mactan


Gihandum sa dakbayan sa Lapu-Lapu, taliwa sa kasamok sa pulitika, ang ika-486 nga kasumaran sa nabantog na nga Kadaugan sa Mactan (kanhi gitawag nga Bahug-bahog sa Mactan). Susama sa naandam, gihugupan sa katawhan nga nisaksi, tibuok adlaw karong Biyernes, sa mga pasundayag agig paghandum sa Kadaugan. Kon itandi sa paghandum sa milabayng mga tuig, yano lang kini. Ang nakalahi lang mao ang bag-ong tribal dances nga gipakita. Karong tuiga, si Gardo Versoza maoy midala sa papel ni Lapu-Lapu, si Brad Murdock ang midala sa papel ni Ferdinand Magellan ug si Alma Concepcion maoy midala sa papel ni Rayna Bulakna. Matag tuig usab lain-laing artista ang modala sa mga papel sa main characters sa Battle of Mactan. Karong tuiga, P1.5 million ang gigahin Lapu-Lapu City alang sa paghandum sa Kadaugan. Niadtong ika-27 sa Abril 1521 miabot ang tropa ni magellan sa Punta Engaño, Mactan Island. Apan gisugat sila ni Datu Lapu-Lapu aron babagan ang tinguha sa mga kolonyalista. Ang pagsupak ni Lapu-Lapu sa laraw sa mga langyaw misangpot sa gubat nga mihatod sa kamatayon ni Magellan. Gihandum and Kadaugan sa Mactan matag tuig aron pagpasidungog sa kaisog ni Lapu-Lapu ug sa mga lumad nga mibuhis sa ilang kinabuhi alang sa kaugalingnan. Gibuhi pagbalik ang kasaysayan pinaagi sa malampusong pagpahigayon sa mga tulumanon nga giandam para sa kasaulugan. -Balitang Bisdak

LOADING CONTENT