Inalis sa poder ni Cabinet Secretary Leoncio “Jun” Evasco ang pamamahala sa National Food Authority (NFA) Council, ayon sa isang opisyal  ng Malacañang nitong Martes.

Ayon kay Presidential spokesperson Harry Roque, sa pulong ng NFA Council na ginanap sa Palasyo nitong Lunes, ibinalik ni Pangulong Rodrigo Duterte ang pamamahala sa NFA at dalawa pang ahensiya [ang Philippine Coconut Authority at  Fertilizer and Pesticides Authority] sa Department of Agriculture.

Pinamahalaan ni Evasco ang NFA sa bisa ng Executive Order 1 na ipinalabas ni Duterte noong 2016.

Ang Cabinet Secretary din ang namamahala sa 11 iba pang ahensiya ng gobyerno.

Sa isang pahayag, sinabi ni Evasco na iginagalang niya ang desisyon ng Pangulo, at nagpasalamat ang kalihim sa ibinigay na oportunidad na pamunuan ang konseho na siyang namamahala sa pag-aangkat ng mga bigas.

“I have full respect with the decision of the President given the encompassing nature and impact of the National Food Authority on the Filipino people and the farmers,” ani Evasco.

“We have put in place several policy guidelines that have provided a more transparent, competitive, inclusive and accountable system of procurement and distribution of NFA rice as a result of more than 20 Council Meetings since my designation by the President as NFA Council Chair,” dagdag niya.

Hiniling naman niya sa bagong mamumuno sa NFA Council, na inaasahang si Agriculture Secretary Emmanuel Piñol na gamitin ang mga reporma na kanilang nailatag at ipagpatuloy ang sistema ng pagbabago.

“At this critical juncture, today is the best time for NFA to move towards being a true partner of the farmer in delivering better quality services, a true partner of the Filipino poor consumers in providing affordable and quality rice to the public and a true partner of the nation in ensuring food security for rice especially during the periods of calamities and disasters,” ani Evasco, na nagsilbing national campaign manager ni Duterte sa nagdaang May 2016 presidential elections.

Naging laman ang mga balita ang NFA at NFA Council nitong nakaraang mga linggo matapos na maubos ang reserbang NFA rice sa mga bodega.

Ang NFA rice na pawang inaangkat sa ibang bansa ang karaniwang binibili ng mga mahihirap dahil mas mura ito kumpara sa mga commercial rice.—FRJ, GMA News