Umano'y anak ni Jess Lapid Jr. at tatlong iba pa, arestado sa buy-bust operation

Sa ikinasang buy-bust operation ng Pasig Station Drug Enforcement Unit, naaresto nitong Martes ang umano'y anak ni Jess Lapid Jr. at tatlong iba pa matapos mahulihan ng marijuana.

Dalawang libong pisong halaga ng illegal na droga ang binili ng operatiba at nakipagkita siya kay Jose Maria Lapid alias Joey sa Ortigas Avenue Extension sa Barangay Sta. Lucia sa Pasig City.

Nang magkaabutan na ng item at pera ay doon na inaresto si Lapid at mga kasamahan niyang sina Franklin Ramos, Zackaria Bansil, at Xavier Allan Raymundo.

Itinago ang marijuana sa dalawang punda ng unan at eco bag.

Sa kabuuan, nasa dalawang kilong ilegal na droga ang nasabat na may street value daw na P80,000.

Anak ni Jess Lapid Jr. (action star) at tatlong iba pa, arestado sa buy-bust operation sa Pasig; dalawang kilo ng umano’y marijuana na itinago sa punda ng unan, nakuha. | via @_jamesJA pic.twitter.com/c2vzzz9xHD

— GMA News (@gmanews) July 9, 2018

Ayon sa Pasig Police, dalawang linggo na ang nakaraan nang nakatanggap sila ng impormasyon mula sa concerned citizen kaugnay sa pagbebenta ng marijuana ng grupo.

Aalamin daw nila kung saan kinukuha ang ilegal na droga.

Base sa intel ng Pasig Police, anak ng action star na si Jess Lapid Jr. ang naarestong si Jose Maria pero itinanggi ito ng suspek.

Itinanggi rin niya na nagtutulak siya at napag-utusan lang na ihatid ang marijuana.

Ginawa raw niya 'yun dahil sa pera.

Mahaharap ang mga suspek sa kasong paglabag sa Comprehensive Dangerous Drugs Act of 2002. —KG, GMA News