Inamin ng batikang aktres na si Cherie Gil na hindi niya inaasahan na tatatak sa publiko ang linya niyang, "You're nothing but a second-rate, trying hard copycat!" nang i-deliver niya ito sa pelikulang "Bituing Walang Ningning" noong 1985.

"Alam mo hindi ko rin alam kasi wala sa amin ang nag-expect na makarating sa ganu'ng klaseng iconic na tatak; na pati 'yung mga hindi pa pinanganak nu'ng panahon na 'yun eh alam," sabi ni Cherie sa nakaraang episode ng programang "Tonight With Arnold Clavio.

"Feeling ko dahil sa nangyari nu'ng panahon ng 80s na bumubunga pa lang 'yung women empowerment nu'ng panahon na 'yon. And what's nice about 'Bituing Walang Ningning' kaya isa sa mga paborito kong pelikula rin, for me classic na 'yan," dagdag pa niya.

Ikinuwento pa ni Cherie na iba ang paggawa ng pelikula noon dahil kinakailangan ng mga mabibigat na linya.

"Paggawa ng pelikula nu'ng araw kasi iba eh. May pagka-campy 'yung mga linya, mabibigat na Tagalog and the story goes na hindi dahil sa may kontrabida at may bida, may ipinaglalaban 'yung dalawang babae na prinsipyo, at 'yung kanilang gusto sa buhay na walang mali, 'yung isa love, 'yung isa career. So hindi 'yung basta-basta na nag-agawan ng asawa, whatever, walang gano'n. The most important was they were by their desires," paliwanag niya.

"Sa palagay ko maraming nag-identify do'n. At saka siguro dahil sa, maganda talaga 'yung linya eh," pagpapatuloy ng aktres.

Sa pelikulang "Bituing Walang Ningning," ginanap ni Cherie ang karakter ni Lavinia Arguelles, isang sikat na singer. Ngunit masasapawan siya sa pagkanta ng kaniyang number one fan na si Dorina Pineda na ginampanan ni Sharon Cuneta.

Sa naturang pelikula, matapos i-deliver ang sikat na linya niyang, "You're nothing but a second-rate, trying hard copycat!" binihusan ni Cherie ng wine ang Megastar.

"Talagang nasa script 'yung itatapon namin 'yung wine. Kailangan sabihan si Shawie para prepared din siya, 'di ba?," kuwento pa ng aktres.

Patuloy ni Cherie, mga "take one actors" daw sila ng mga kapuwa niya artista dahil mahal ang film na gamit sa camera, 'di gaya ng mga digital ngayon.

"Naging collaboration 'yung linyang 'yon so 'yung controversy ng kung sino ang sumulat at kung sino ang nagmamay-ari, para sa akin nakarating na 'yung linya sa point na nakilala ng marami so for me, it's public domain. Everybody owns that line, and I just happened to be the vessel of that line," sabi ni Cherie.

Sa naturang programa, sinabi rin ni Cherie na proud siyang maging anak ng kaniyang mga magulang na sina "Elvis Presley of the Philippines" Eddie Mesa at Rosemarie Gil.

Sa tuwing may sakit daw ang kaniyang ina, si Cherie ang pinapapunta sa set para mag-dubbing. "In a way, 'yung naging istilo ng mom ko, 'yung acting niya, 'yung manners niya, na-absorb ko na rin. So most of the time, in the time of my mom when she was active as an actress, lagi siya 'yung strong woman, kontrabida rin. So I guess I'm the copycat," saad niya. -- FRJ, GMA News