Regine Velasquez aminadong 'di laging mapoprotektahan si Nate sa pambu-bully

Aminado si Asia's Songbird Regine Velasquez na hindi niya palaging mapoprotektahan ang kaniyang anak na si Nate sa pambu-bully ng mga tao sa social media kaya ang ginagawa niya ay paalalahanan ito para maging matatag.

Naging bagong endorsers sina Regine at Nate ng isang fastfood company.

Sa exclusive preview ng kanilang commercial noong Abril 12, inihayag ni Regine na sa halip na gawan niya ng social media account ang anak ay tinatadtad lamang niya ang kanyang pages ng mga pictures ni Nate.

"Wala pa naman siyang sariling account, and I don't want for him to have his own account. Meron siya pero ako rin 'yung gumawa nu'n actually. Then I started with Instagram. If you notice, if you have been following me, it was really all him. Siguro on a day, I'd post like five pictures kasi tuwang-tuwa ako, kitang-kita ako," sabi ni Regine.

Kuwento ni Regine, gusto rin niyang magkaroon ng privacy si Nate.

"I was so happy to be a mom, 'yun talaga 'yun. And I just wanted to share my happiness with everyone. That's why I'm taking pictures of him and sharing it online. Now that he's getting older, if you notice, I kind of rarely post his pictures kasi I wanna have his privacy na. Magpo-post lang ako pagka 'yung okay lang sa kaniya. Sometimes I will ask him or minsan, siya mismo ang magsasabi na 'Can you video me? And you can post it' Kasi minsan meron siyang 'You can video me but only for personal use.'"

"I will honor his request. If he says no then we won't. Kasi makikita din naman niya 'yun eh, parang kawawa naman. So ngayon medyo nag lie low na ako sa pagpo-post ng mga pictures niya," dagdag niya.

Inamin ni Regine na hindi niya mapipigilan ang ilang tao na magsalita ng masasamang bagay sa kaniya, pati na rin sa kanyang anak, kaya ang magagawa niya ay laging paalalahanan si Nate.

"Alam mo, I think I won't be able to protect him from cyberbullying. Kasi, you know, he'll grow up and he knows how to read everything. I won't be able to protect him. Hindi ko siya masi-shield du'n. But siguro I just equip him with proper reminders. Ganun na lang siguro, kakausapin ko na lang siguro talaga para hindi na siya maa-affect. I think naman, kung maganda ang values ng anak mo, hindi naman sila magpapa-affect doon, e."

Pati si Leila, anak ng asawa niyang si Ogie sa dati nitong asawang si Michelle van Eimeren, ay hindi rin nakaiwas sa pambu-bully, kaya pinapaalalahanan niya rin ito.

"Actually, ang medyo inaanuhan ko is si Ate Leila. Si Ate Leila kasi, siyempre she's grown up na. She's 20 years old. There was this time when she got bullied, inis na inis ako talaga ako. Inaway ko, actually. "Doon kami medyo ano... Si Ate Leila, siya yung mas maa-affect. But, you know, she's been with us for over a year now, she's okay na." —ALG, GMA News