Marian Rivera nanalong Best Drama Actress sa 27th Star Awards for TV

Nagwagi ang Kapuso Primetime Queen na si Marian Rivera bilang Best Drama Actress para sa kaniyang papel sa GMA show na "Temptation of Wife" sa katatapos na 27th PMPC Star Awards for Television na idinaos sa AFP Theater ng Camp Aguinaldo sa Quezon City.

 

Kinilala rin ang Kapuso stars na sina Ruru Madrid bilang Best New TV Personalities para sa "Maynila: Faith In Love," Michael V. bilang Best Comedy Actor para sa "Bubble Gang," at Rufa Mae Quinto bilang Best Comedy Actress para sa "Bubble Gang."

 

Ayon sa ulat ng PEP.ph, pinarangalan din ang Kapuso programs na "Bubble Gang" bilang Best Gag Show, ang "Magpakailanman" bilang Best Drama Anthology, at "Pepito Manaloto" bilang Best Comedy Show.

 

Samantala, kinilala naman ang longest running noontime show na "Eat Bulaga!" bilang Hall of Famer sa PMPC para sa kategoriyang variety at reality show.

 

Ang programang "Extra Challenge" naman ang nakatanggap ng parangal bilang Best Reality Competition Program, ang"Celebrity Bluff" bilang "Best Game Show," at "StarTalk" bilang Best Showbiz-Oriented Talk Show.

 

Bukod pa rito, natanggap ng "State of the Nation with Jessica Soho" ng GMA News TV ang parangal bilang Best News Program.

 

Best Newscaster naman si Mike Enriquez ng "24 Oras" at Best Public Service Program ang "Imbestigador." Kinilala rin si Vicky Morales bilang Best Public Service Program Host para sa "Wish Ko Lang!" habang Best Educational Program naman ang "Born To Be Wild."

 

Best Documentary Program ang "I-Witness" ng GMA at nanalong Best Documentary Program Hosts ang mga host ng programa na sina Kara David, Howie Severino, Sandra Aguinaldo, at Jay Taruc. 

 

Nanalo rin ang "I Juander" ng GMA News TV bilang Best Magazine Show, si Jessica Soho bilang Best Magazine Show Host para sa"Kapuso Mo, Jessica Soho," at Best Morning Show Hosts sina Arnold Clavio, Rhea Santos-De Guzman, Lyn Ching-Pascual, Suzi Entrata-Abrera, Danilo Federez, Lhar Santiago, Love Añover, Atty. Gaby Concepcion, Drew Arellano, Winnie Monsod, Pia Arcangel, Luanne Dy, Connie Sison, Monica Verallo, Nathaniel Cruz, Tonipet Gaba, Susan Enriquez, at Ivan Mayrina ng "Unang Hirit."

 

Nanalo rin ang cast ng "Tropang Potchi" na sina Sabrina Man, Miggy Jimenez, Lianne Valentino, Isabel "Lenlen" Frial, Nomer Limatog, Miggs Cuaderno, Kyle Danielle Ocampo, at Potchi Mascot bilang "Best Children Show Hosts."

 

Kinilala naman bilang Best Travel Show ang "Biyahe ni Drew" ng GMA News TV, si Richard Gutierrez bilang Best Travel Show Host para sa"Pinoy Adventure," at Solenn Heussaff bilang Best Lifestyle Show Host para sa "Fashbook." —Mac Macapendeg/KG, GMA News