Maliban sa paggawad ng parangal sa mga mahuhusay na artista at pelikula, bibigyan-pugay din sa  2nd Eddys Awards ng Society of Philippine Entertainment Editors’ (SPEEd) ang mga naging bahagi ng showbizness  na pumanaw na.

Sa awarding ceremony na gaganapin sa darating na Hunyo 3, 2018, bibigyan ng special tribute (Posthumous) ang mga namayapang sina Chinggoy Alonso, Herminio Bautista, Bernardo Bernardo, Emmanuel “Maning” Borlaza, Willy Cruz,  Mario J. Delos Reyes, Isabel Granada, Franco Hernandez, Mario Hernando, Argel Joseph, Cornelia “Angge” Lee,  Alfie Lorenzo, Gil Portes, Soxy Topacio, Romeo Vasquez, Donna Villa, Rolly Quizon at Zeny Zabala.

Samantala, tatlong special awards naman ang ipagkakaloob ng Eddys ngayong taon: Ang Joe Quirino Award ay igagawad sa yumaong movie reviewer at professor na si Mario Hernando (Posthumous);  ang Manny Pichel Award ay ibibigay sa Entertainment Editor at columnist na si Ricky Lo; at ang Producer of the Year ay igagawad kay Vic del Rosario, Jr., ng Viva Films.

Kasabay nito, maglalaban-laban naman para sa Best Film award ang "Deadma Walking,""Respeto," "Smaller And Smaller Circles," "Unexpectedly Yours," at "Birdshot." 

Nominado naman para sa Best Actress category sina Joanna Ampil (Ang Larawan);  Mary Joy Apostol (Birdshot); Sharon Cuneta (Unexpectedly Yours); Bela Padilla (100 Tula); at Alessandra de Rossi (Kita Kita).

Ang Best Actor award  ay paglalabanan nina Edgar Allan Guzman (Deadma Walking); Abra (Respeto); Joshua Garcia (Love You To The Stars And Back); Aga Muhlach (Seven Sundays); at Ronaldo Valdez (Seven Sundays). -- FRJ, GMA News