MANILA – Tatlumpung opisyal kabilang si Armed Forces of the Philippines (AFP) Chief of Staff Gen Victor Ibrado ang nakapasa sa makapangyarihang Commission on Appointments nitong Miyerkules.

Bukod kay Ibrado, pinagtibay din ng CA ang promosyon ni Lt. Gen. Oscar Rabena, commanding officer ng Philippine Air Force, habang nabitin naman ang kumpirmasyon ng 16 na flag at senior officers hangga’t hindi sumisipot sa pagdinig si Defense Secretary Gilberto Teodoro Jr.

Pinagpapaliwanag ng mga kasapi ng CA committee on national defense si Teodoro kaugnay sa dami ng bilang ng mga kasalukuyang heneral at pondong inilaan para sa sahod ng mga ito.

Nabitin din ang kumpirmasyon ni dating AFP chief of staff (Ret) General Alexander Yano bilang ambassador to Brunei Darussalam, matapos harangin ni Senate Pro-Tempore Jose Estrada.

Hiniling ni Estrada sa komisyon na ipagpaliban ang pagdinig sa kumpirmasyon ni Yano matapos maghain ng petisyon si Senate President Ernesto Maceda na tutol sa bagong trabaho ng retiradong opisyal.

"This has the effect of not isolating but in fact making the military and police establishment a partisan organization. All of them seem to me applying or (are) being offered jobs in civilian positions after they retire. So this issue has to be raised right now," ayon kay Maceda.

Kung nabitin si Yano, nakalusot naman si Retired general Cardozo Luna bilang ambassador to The Netherlands.

Ang iba pang kinumpirma ng CA ay sina Ambassador to Brazil Even Garcia; Ambassador to Finland Ma. Angelina Sta Catalina; Ambassador to Timor-Leste Aniceta Bugarin; Ambassador to Bahrain Corazon Yap-Bahjin; Ambassador to Poland Alejandro del Rosario; Ambassador to United Kingdom Antonio Lagdameo; at Ambassador to the Vatican Mercedes Arrastia Tuason.

Pasado rin sa komisyon ang ad interim appointments sa foreign service officers nina Mary Jo Aragon, Victoriano Lecaros, Eva Betita, Jose Eduardo Malaya III, Danilo Ibayan, Cleofe Natividad, Lourdes Yparraguirre, Crescente Relacion, Leslie Baja, Teresita Daza, Belinda Ante, Wilfredo Santos, Vicente Vivencio Bandillo, Marciano de Borja, Jose Victor Chan-Gonzaga, Christopher Patrick Aro, Edna May Lazaro, Maria Lilia De Vera, Jesus Enrique Garcia II, Roberto Bernardo, Raphael Hermoso at Gunther Emil Sales. - GMANews.TV