School opening sa Lunes ipinapaurong dahil sa takot sa A(H1N1)

MANILA – Kasunod ng paglobo sa bilang na 14 ang kaso ng Influenza A (H1N1) virus sa Pilipinas sa loob lang ng walong araw, nanawagan ang ilang kongresista sa pamahalan na pag-aralang mabuti ang posibilidad na ipagpaliban ang pabubukas ng klase sa Hunyo 1. Ayon kay Marikina City Rep. Marcelino Teodoro, dapat bigyan halaga ang kaligtasan ng mga bata at tiyakin muna na ligtas sa kinatatakutang virus ang mga paaralan bago simulan ang klase. "Appropriate measures should be taken to evade further exacerbation of the situation. The Department of Health (DOH) should intensify its publicly released guidelines to prevent being infected by the virus along with the setting up of temperature reading areas in schools," paliwanag ni Teodoro, pinuno ng House committee on people participation. Nangangamba umano ang kongresista dahil mas madaling dapuan ng sakit ang mga bata lalo na sa siksikang silid-aralan sa mga pampublikong paaralan. "The DOH must inform the public of the severity of the virus once contracted so the public will be continuously vigilant and responsible once symptoms of the virus are spotted," ayon sa kinatawan ng Marikina. Idinagdag naman ni Gabriela party-list Rep. Luzviminda C. Ilagan na dapat ipagpaliban ang pagbubukas ng klase kung may posibilidad na kumalat ang virus. "Better safe than sorry! But if cases are few, no need to postpone," pahayag ni Ilagan. Iminungkahi rin ni Sultan Kudarat Rep. Datu Pax S. Mangudadatu, sa DOH at Department of Education na pulungin ang mga Local Government Units (LGUs) upang makapaghanda ng ibayong plano upang hindi kumalat ang A(H1N1) lalo na sa mga paaralan. "With the advent of the opening of classes on the first week of June this school year, these agencies should look at the specific plans they have in place and coordinate among themselves to preclude the spread of the killer disease," pahayag ng kongresista mula sa Mindanao. - GMANews.TV