Seguridad sa Iloilo ginpahugtan para sa undas

Pila na lang ka adlaw ang nabilin, magadinaguso naman ang mga pumuluyo sa mga seaport, airport kag terminal sang bus para magpa-uli sa tagsa ka mga lugar may kaangtanan sa undas. Gani subong pa lang, hugot nga seguridad na ang ginapatuman sa sini nga mga lugar. Sa iloilo airport, may mga gin improve sa operasyon sang aviation security. Apisar kulang sa manpower, ginasigurado gid nga mabantayan ang airport 24-oras ilabi na subong nga nagahilapit ang fiesta minatay kag ginalauman nga magadugok ang mga pasahero pasulod kag pa gwa sa Iloilo. Sa mga nagabiyahe padulong sa Bacolod, handa naman ang mga security guard kag Coast Guard sa pagpaluntad sang kalinong kag katawhay sa ti-on nga magdugok ang mga pasahero. Mga presyo Samtang nagalakat ang tinuig, nagapigaw man ang baligya-anay sang mga ginagamit sa handa tagsa mag tigkalalag. Ini ang pahayag ni Marites Poja, nagabaligya sang pilit kag muscovado nga kalamay, ang nagapanguna sa mga ingrediente sa mga ginahanda sa fiesta minatay. Ang gantang subong sang pilit tag P90 kag P40 ang kilo sang muscovado. Halin pa kuno nagligad nga semana nga amo sini ang presyuhanay kag wala lang mapaktan kon magasaka pa sa masunod nga mga inadlaw. May yara naman sang mga pumuluyo nga nagabakal na sang kandila sa diin P2 ang pinakanubo nga bili kag masobra sa isa ka gatos ka pesos ang pinakamahal. Kon bulak naman ang pagahambalan, medyo barato pa ang bili, ang anthurium nga halin sa cebu, Baguio kag Mindanao tag P240 ang dosena, ang Chrysanthemum nga puti, P80 ang dosena kag ang yellow tag P120. Ang pinakabakal nga Malaysian mums halin P200 tubtub P240 ang dosena depende sa klase. May yara man sila sang na arrange na nga bulak, tag P700 ang dalagku. Sa Central Market, may ready-to- buy na nga mga bulak kag nagabili halin P200 pataas ang na-arrange na nga bulak depende sa budget sang kostumer. Sa paglibot sa Ratsada sa mga patyo, may mga pumuluyo na nga nagapaninlo sa mga pantyon apang indi pa gid man madamo. Ginala-uman nga Huwebes pa magasugod ang pagdagsa sang mga tawo para tatapon ang lulubngan sang ila mga minatay. - Ratsada