Babaeng nagpablotter sa alegasyong kidnapping sa Davao City, gidakop!

May 24, gidakop sa mga personahe sa Investigative and Detection Management Branch sa Davao City Police Office si Catherine Graciela Manalo, 36 anyos, sa mismong girentahang lawak niini sa Pioneer Street Juan Luna Extension, Davao City. Si Manalo ang nagpa-blotter sa San Pedro Police niadtong May 23 nga gikidnap kuno ang iyang upat ka mga igsuon nga gikan sa Canada ug kauban sa iyang mga igsuon nga duha ka British Nationals, butang nga gika-alarma sa kapulisan, business sector ug katawhan sa Davao, apan nasayrang himo-himo lang diay kini ni Manalo. Sa imbestigasyon, nasayran nga nagsugod ang pagpanglimbong ni Manalo dihang nakautang kini ug halos P400,000 sa iyang landlady nga si Candice Ann Jayme. Sumala sa landlady nga si Jayme nga kaniadto pa kuno nagsaad kaniya si Manalo nga bayaran ang iyang utang kung makauli na ang iyang igsuon gikan Canada. Apan midagan ang panahon namatikdan sa landlady nga namakak si Manalo hangtud misangpot sa pasangil ni Manalo nga gikidnap iyang igsoon butang nga iya usab gipa-blotter sa kapulisan. “ Naalarma di lang ang DCPO kundi lahat ng mga Dabawenyo, lalo pa’t nga foreign nationals ang nireport na nakidnap, seryoso yon", matud ni P/Supt. Antonio Rivera, Chief sa IDMB-DCPO May 25 sa buntag gipailawom si Manalo sa inquest proceedings, gikasohan kini sa paglapas sa Article 318 of the Revised Penal Code kon other forms of deceit. Gipasalig ni prosecutor Victoriano Bello Jr. nga resolbahon ang gidusong kaso sa dali nga panahon. Nasayran nga duha na diay ka higayon nga gihimo ni Manalo ang susamang modus. Tuig 2009 nagrenta usab kini sa Mintal apan wala kini mibayad. Wala kini nakasohan kaniadto human midumili ang iyang landlady sa pagpasaka ug kaso. nanghinaut karon ang pulis dili kini buhaton sa uban sanglit dili gayud kuno sila magduha-duha sa pagpasaka ug kaso.