Albularyo giputlan ug ulo

Putol na ang ulo dihang gihaya sa kapilya sa Purok Dos, Poblacion Montevista Compostela Valley Province ang iladong albularyo sa ilang lugar nga si Alfredo Panes Jr., singkwenta anyos. Matud sa asawa sa biktima nga si Nenita, nagpatambal ang suspek nga si Feliciano Ramuga Jr., tungod dili kuno normal ang nilihukan niini, ug matud pa gisudlan ug dautang espiritu. Sa ilang balay pa kuno natulog ang suspek apan Hulyo 18, Lunes sa buntag, walay kahadlok ug kalit gitigbas sa suspek ang albularyo. “Ingon siya nga adtua akong mama mangayo ko ug gatas, di pag ingon niya nga mangayo ug gatas, mituman pud ang bata, pagkahuman nakatalikod lang siguro akong anak, didto na, patay na", matud ni Nenita. Pagkahuman ug tigbas sa suspek ngadto sa albularyo, gilayon usab kining misurrender. Gisulayan ug hinabi sa GMA News ang suspek apan dili masabtan ang gipangistorya niini. Bisan ang inahan sa suspek nga si Prescila Ramuga, dili makasabot sa anak. “Kato may gitambalan, unya giingnan siya nga pahawa sa bintana ug pultahan, wa man maminaw unya siguro ang dautang espiritu naadto sa iyaha", matud ni Ramuga. Gamit ang “curve bolo" nga pangtabas sa sagbot ug atsa ang gipangputol sa liog, matud ni Police Senior Insp. Alain Terence Licdan, ang hepe sa Montevista Police. Sa karon, ipasuta pa ang kahimtang sa suspek kung nalisuan pa gyud kini sa pangisip.