Insentibo sa industriya ng musika, aprubado na sa Kamara

MANILA – Inaprubahan na sa Kamara de Representantes ang panukalang batas na nagkakaloob ng insentibo at subsidiya sa Pinoy music industry. Sa pag-apruba sa House Bill 4443, umaasa ang mga kongresista na mahihikayat ang mga Filipino na lumikha ng mas maraming awitin at makatulong para muling sumigla ang original Pilipino music industry. Sa ilalim ng panukalang batas na iniakda nina Bayan Muna party-list Rep. Teddy Casiño at Sigfrido Tinga (Taguig City), aamyendahan ang Republic Act 7160 at Local Government Code. Dahil sa malaking buwis na kinakaltas umano sa local music industry, nahihirapan umanong makipagsabayan ang OPM sa mga dayuhang mang-aawit. “It is high time for the state to be proactive and provide the necessary legislative and financial support to ensure that Filipino culture survives and flourishes," paliwanag ni Tinga sa isang pahayag nitong Martes. Idinagdag naman ni Casiño na malaking pabigat din sa mga lokal na mang-aawit ang kinukuhang amusement tax. Dahil umano sa mataas na singil sa buwis sa mga konsyerto ay halos wala ng kinikita ang mga mang-aawit at mga producer, na kadalasan ay lugi o nakababawi lang sa kanilang ginastos. “The lack of incentive dissuaded producers and managers from organizing live performances, at the very least, they scrimp on production resulting in lower employment opportunities in the industry and the tendency to hold back the artist’s creativity in favor of economic practicalities," ayon kay Casiño. Sa ilalim ng panukala, ang makokolekta sa amusement tax mula sa mga konsiyerto at iba pang katulad na pagtatanghal ay gagamitin bilang subsidiya sa mga workshop ng local theater musical o pagsasanay sa mga local artist at mga kompositor. “Earmarking the proceeds from amusement tax from concerts of foreign artists for much-needed workshop and training subsidies will further empower the music industry and encourage the creation of original Filipino music," dagdag ng kongresista. - GMA News