Obispo na pinagbantaang dudukutin, binigyan ng seguridad ng pulisya

Nagbigay na ng seguridad ang Baguio City Police kay Baguio Bishop Carlito Cenzon matapos itong makatanggap ng pagbabanta na siya’y dudukutin. Ayon sa pamunuan ng pulisya sa Baguio, nakadamit pangsibilyan ang mga pulis na itinalagang security ng obispo. Sinabi ng pulisya na ang banta kay Cenzon ay natanggap sa pamamagitan ng text message. Humihingi umano ng pera sa obispo ang nagpadala ng mensahe. Tumanggi naman si Cenzon na magpa-interview pa dahil ayaw na raw niyang lumala pa ang isyu. Pero sa kanyang ipinadalang text message sa GMA News, nagpasalamat siya sa itinalagang police security para sa kanya. - GMA News