MILF, inireklamo ang pag-aresto sa kanilang opisyal at anak nito

Inirereklamo ng Moro Islamic Liberation Front (MILF) ang pag-aresto na walang arrest warrant sa isa nilang opisyal at sa anak nito sa probinsya ng Sarangani nitong Disyembre 14. Pinirmahan ni MILF Coordinating Committee for the Cessation of Hostilities (CCCH) head Said Sheik ang reklamo, ayon sa isang artikulo sa website ng MILF nitong Linggo. Hindi nakasaad sa artikulo ang pangalan ng inaresto ngunit inilarawan niya ito bilang isang "MILF town official" at isang pulitiko. Kinilala naman bilang Muhar Udda, miyembro ng 105th Base Command ng Bangsamoro Islamic Armed Forces (BIAF), ang anak ng opisyal ng MILF na inaresto. Samantala, iginiit naman ng MILF sa CCCH panel ng gobyerno na pagtibayin ang reklamo upang palayain agad si Udda. Ipinadala ang reklamo kay Government of the Philippines-CCCH chairperson Brig. Gen. Ariel Bernardo, na nagsasabing inaresto ang opisyal at si Muhar Udda sa Barangay Lagundi, Kiamba sa probinsya ng Sarangani. Ayon sa MILF, pagmamay-ari ni Muhar Udda ang M-14 rifle nasabat ng mga awtoridad mula sa kanyang bahay. Sa isang liham, inihayag ni Sheik na sinalakay ng 73rd Infantry Battalion at Philippine National Police-Region 12 ang bahay ng MILF opisyal, na ayon pa rito isang  "in blatant violation of the spirit of the current peace negotiation and the ceasefire between state forces and MILF fighters." Dagdag pa, inihayag ni Sheik sa naturang liham na tapat umano si Muhar Udda kay MILF chairman Al Haj Murad. "The letter further stressed that both the raid and the arrest were blatant violations of the existing ceasefire accord between the Government of the Philippines and MILF, pursuant to Section 3, Article 1 of the Implementing Operational Guidelines Government of the Republic of the Philippines-MILF Agreement on General Cessation of Hostilities (AGCH), and the Implementing Guidelines of the Security Aspect of the GRP-MILF Agreement on Peace of 2001, particularly paragraphs 3.2.2," ani MILF. Inihayag ding ng MILF na ang paglabag ng gobyerno ay isang paraan upang dungisan ang peace process sa pagitan ng MILF at gobyerno. Kasalakuyang nakapiit si Udda sa PNP Headquarters sa Camp Lyra sa General Santos City. — Amanda Fernandez /LBG, GMA News