Kwentong Kapuso: Resolusyon sa Bagong Taon

Resolusyon sa Bagong Taon ni Maria Paz Samelo Sa pagsapit ng bagong taon karamihan sa atin ay nagkakaroon nang kanya-kanyang resolusyon na baguhin ang ginagawa at harapin ang hamon Ngunit mayroon lang akong katanungan… ito ba'y talagang ating nagagawa sa tamang paraan o ito ay kasabihan lang? para lang may masabi sa ating kinabukasan? Halimbawa sa isang mag-aaral susundin ang ina sa kanyang mga pangaral ngunit kalaunan ito rin ay malilimutan dahil sa masamang impluwensiya ng kaibigan. Sa mga taong gustong pumayat pigilan daw kumain at gawin ang nararapat pero pag nasa harapan ang pagkaing masasarap nawawalang silbi ang lahat ng pinapangarap. Sa mga taong palaging tinatamad baguhin na daw ang ugali agad-agad ngunit 'pag may pagkakataong magpahinga ayan na at 'di mo na mapipilit pa. Sa mga taong 'di tapat sa asawa resolusyon sa sarili magbago na daw talaga ngunit 'pag nandiyan na sasabihing “bahala na" at ang kawawang asawa umiiyak at nagdurusa. Sa mga taong makasarili ugaling ganyan huwag na daw manatili alisin na daw dahil bagong taon na ngunit hanggang salita lang pala. Alam kong marami tayong nais baguhin sa ating mga ginagawa at sa sarili rin ngunit kailangan lang ay disiplina at determinasyon upang ang ating resolusyon sa bagong taon ay maging matagumpay at matupad ang nilalayon. Tandaan mga kababayan ang pagbabagong nasimulan 'di lang gagawin pagsapit ng susunod na taon sa halip ay araw-araw gawin para buhay ay sumulong. -- GMA News Ano ang kwento mo? Mga Kapuso, tuloy ang kwentuhan. Sana’y hindi kayo magsawa sa pagtangkilik sa ating pitak na ito. Habang may mga kababayan tayo sa abroad - pati ang kanilang mga kabiyak, anak, ina, ama o sinuman na kabahagi ng kanilang buhay - na nais magpaabot ng kanilang saloobin, mananatili po ang inyong Kwentong Kapuso. Katulad ng dati, hindi kami magsasawa na basahin ang inyong mga kwento - maigsi man o mahaba. Kahit na ang laman nito ay naglalabas ng sama ng loob, nagbibigay ng inspirasyon, gustong magpayo, magsumbong, magpatawa o kahit nagpapalipas lang ng oras. Kaya hihintayin namin ang inyong mga email na maaari ninyo itong ipadala sa Pinoyabroad@gmanews.tv Sa inyo mga kababayan namin saan mang dako sa mundo, kami po'y saludo sa inyo. Kaya ilabas ang iyong saloobin, ikuwento mo Kapuso!