Regulasyon pagtan-aw sa mga butanding sa Oslob, naka-apekto sa mga mangingisda

Halos kada adlaw adunay mga local ug foreign tourists nga modagsa sa lungsod sa Oslob sa habagatang Sugbo aron sa pagsud-ong sa mga whale sharks o butanding sa maong lungsod.

 

Nahimo nang inila sa mga turista ang maong mga butanding tungod sa kamahigalaon niini.

 

Apan tungod usab niini nagpagawas ug regulasyon ang lokal nga pangagamhanan aron maprotektahan ang mga butanding o tuki. Adunay gibana-banang katorse ka mga butanding ang anaa sa lungsod sa Oslob.

 

Apan sa pag-adto sa GMA News sa Oslob niadtong Sabado, daw sa nag-boycott ang mga butanding tungod kay wala sila mipakita sa mga turista nga tulo ka oras nga nagpa-abot kanila. Duda sa uban, wala na pakan-a sa mga mangingisda ang mga tuki hinungdan nga wala na magpakita.

 

Gihimakak hinuon ni Ramonito Lagahit ang maong mga pasangil. Matud niya, wala sila makakuha ug uyap nga maoy kinaon sa mga tuki. Dili usab tinuod nga wala kini nila pakauna sanglit nagpagawas ug regulasyon ang kagamhanan. Gikompirma hinuon niya nga maka-apekto sa ilang panginabuhian ang pag-regulate sa kagamhanan sa pagsud-ong sa mga butanding sa Oslob. — Gregy Magdadaro/AF/RSJ, GMA News