MMDA, handa nang ipagpatuloy ang kampanyang 'Baklas Billboard'

Matapos ipinag-utos ng Makati court, ipagpapatuloy na ng Metropolitan Manila Development Authority ang pagbabaklas ng mga naglalakihang mga billboard na hindi sumusunod sa patakaran ng Building Code, kabilang na ang mga nasa EDSA at ibang pangunahing lansangan. Ayon kay MMDA Chairman Francis Tolentino, bibigyan ng sapat na oras ang billboard operators at advertisers para sundin ang utos ng korte. Ibinasura ng Makati court ang petisyong inihain ng Outdoor Advertising Association of the Philippines (OAAP) na naglalayong pigilan ang MMDA sa pagpapatupad sa kampanyang "Baklas Billboard." "We are presently in dialogue with billboard operators and advertisers to work out a mutually acceptable work plan. Definitely, they must conform with the Building Code as soon as possible," ayon kay Tolentino sa isang news release sa MMDA website. "We will also respect the ordinances of local government units which impose more stringent regulations," ani Tolentino. Sa bagong panukala ng MMDA, magkakaroon ng sukat para sa laki at distanya ng mga billboard at ibang outdoor advertising signs sa isa't isa. Nakasaad sa news release ng MMDA na inireklamo ng OAAP ang pagpapanukala ukol sa billboard regulations. Samantala, binigyang pansin ng MMDA  ang desisyon ng korte na nagsasabing walang pinagmamay-aring billboard ang OAAP kaya sila ay hindi "real party in interest." "The real party in interest is the party who stands to benefit or may be injured by the judgment or the party entitled to the avails of the suit," ayon sa korte. Ayon naman kay Tolentino, ang naging desisyon umano ay "significant victory" para sa MMDA. "We want billboards to conform with the National Building Code. We want to regulate the size and distance between these gargantuan signs, and to reclaim beauty and order in our metropolis," aniya. — Amanda Fernandez /LBG, GMA News