Fund drive para sa Pinoy na nasa death row sa Saudi patuloy

Patuloy na gumugulong ang fundraising campaign para makakalap ng SR1.5 milyon (P17.7 milyon) para makatulong sa isang Pilipinong nasa death row sa Kingdom of Saudi Arabia, ayon sa ulat.   Pinamunuan ni dating Philippine Ambassador to Saudi Arabia Antonio Villamor ang nasabing fundraising para tulungan si Rodelon “Eissah” Lanuna, ayon sa ulat ng Arab News nitong Linggo. “We're trying to raise the whole amount asked by the Saudi family for having granted forgiveness to Lanuza, also called Rodelon, in February 2011,” ani Villamor. Sinintensyahan ng bitay si Lanuza dahil sa kasong pagpatay umano sa isang Saudi national noong Agosto 2000. Ayon kay Lanuza, “self-defense” lang daw ang kanyang nagawa. Pinatawad naman ng pamilya ng kanyang biktima si Lanuza kapalit ng "diyya" o “blood money.” Ayon kay Villamor, mula sa SR3.5-milyong hiningi ng pamilya, SR2 milyon pa lang ang nalikom mula sa pagsisikap ni Loida Lewis, isang US-based Filipino-American businesswoman at philanthropist. “The SR2 million includes the P4.6 million from the Philippine government. We need to raise SR1.5 million more,” ani Villamor. Ayon kay Villamor, ilalagay ang pondong nalikom sa Metropolitan Bank and Trust (Metrobank) account sa Riyadh. Sa kabilang banda, sinubukang hilingin ni Villamor ang pagbaba sa halagang hiningi, ngunit hindi ito pinayagan ng pamilya. Nang tanungin kung papayag ba siyang magbigay serbisyo muli sa mga OFW sa oras na humingi ng tulong ang gobyerno, sinabi niya na: “Yes if the assignment is in Saudi Arabia. I have found my stint there very self-fulfilling.” Noong 1999, nag-retire si Villamor bilang ambassador sa Guam at sa tatlo pang accredited island republics (Palau, Federated States of Micronesia, at the republics of Marshall Islands). Pinatawag muli siya sa serbisyo noong Disyembre 28, 2006 nang tinanggap niya ang posisyong Ambassador Bahnarim Guinomla. Nagtapos ang tour of duty ni Villamor sa Kingdom noong Oktubre 4, 2010 kung saan pinalitan siya ng Consul General sa Jeddah na si Ezzedin Tago. – Amanda Fernandez/KBK, GMA News