Bongbong, kinuwestiyon ang Ombudsman sa kanyang acquisition, release ng dollar accounts ni Corona

Kinuwestiyon ni Senator Ferdinand "Bongbong" Marcos Jr. nitong Martes ang pamaraan ng pagkuha ni Ombudsman Conchita Carpio-Morales ng impormasyon tungkol sa umano'y dollar accounts ni Chief Justice Renato Corona.

 

Itinanong din niya kung bakit pinayagang ilabas ni Morales ang mga kontrobersyal na impormasyon.

 

"Ang pagkaintindi ko sa batas... ang requirement para masimulan ang imbestigasyon dapat may predicate crime. Sa batas ng Anti-Money Laundering Act (AMLA) at yung pag-release nung records ay nangangailangan dapat ng court order," ani Marcos sa media.

 

"Kaya kailangan natin itanong siguro sa Ombudsman kung ito ay bagong sistema. Is this a new doctrine that in fact that on the basis of a complaint, the Ombudsman can already gain the information from the Anti-Money Laundering Council (AMLC) and publicize that information?" dagdag niya.

 

Inihayag ito ni Marcos matapos ihayag ni Morales noong Lunes sa impeachment trial ang impormasyong kanyang nakalap mula sa AMLC kung saan mayroon umanong mahigit $10 milyong transactional balances at $12 milyong fresh deposits si Corona sa 82 accounts sa limang bangko.

 

Nabuo ang AMLC dahil sa Republic Act 9160 o ang Anti-Money Laundering Act upang imbestigahan ang ilang mga transaksyong lumalabag sa batas.

 

Kabilang sa AMLC ang Bangko Sentral ng Pilipinas Governor, Insurance Commissioner, at ng Securities and Exchange Commission chair. "It is a very credible body headed by non-partisan individuals with reputations that of independence. I would take seriously what comes from them," ani Tony La Viña, dean ng Ateneo School of Government.

 

Foreign Currency Deposit Act

 

"Kung tutuusin ninyo, there is the foreign deposit law, banking secrecy law, that is supposed to be absolute but somehow that has been pierced. We have to make even more clear how that happened," ani Marcos.

 

"These are questions that we need to ask...if you look very strictly at the procedure that is laid out in the law, this is not what was followed," dagdag niya.

 

Tinutukoy ni Marcos ang Section 8 ng Republic Act 6426 o ang Foreign Currency Deposit Act kung saan nakasaad:

 

"All foreign currency deposits... are hereby declared as and considered of an absolutely confidential nature and, except upon the written permission of the depositor, in no instance shall foreign currency deposits be examined, inquired or looked into by any person, government official, bureau or office whether judicial or administrative or legislative, or any other entity whether public or private."

 

Ang probisyong ito ang naging basehan ng temporary restraining order (TRO) na inilabas ng Supreme Court upang pigilan ang Senado na buksan ang umano'y dollar accounts ng punong mahistrado. Pinagbotohan naman ng Senado na sundin ang TRO.

 

Sa pagpayag sa Ombudsman na buksan at isapubliko ang accounts, maaaring itong magdulot ng paghahain ng kasong harassment, ani Marcos.

 

"Kitang-kita mo kung paano magiging abuso diyan eh parating pa naman tayo sa eleksyon.  Ang kailangan lang palang gawin eh pumila ng complaint at maimbestigahan na agad kung sinuman na napilahan ng complaint," aniya.

 

Hindi ordinaryong abugado

 

Sa hiwalay na panayam naman nitong Martes, inihayag ni Senator Franklin Drilon na mayroong kapangyarihan ang Ombudsman upang buksan ang records ng opisyal.

 

"Yung pong Ombudsman hindi po ordinaryong abogado iyan, retired Supreme Court Justice at yung SALN ni CJ Corona ay may waiver ino-authorize niya ang Ombudsman na tingnan lahat ng records sa pamahalaan para i-check kung tama ang lahat ng ini-report niya sa SALN mismo," aniya.

 

Dagdag nito, hindi rin na dapat alamin ang pamaraan ni Morales sa pagkalap ng impormasyon.

 

"Siguro yung mga teknikalidad na iyan ay hindi dapat mangibabaw sa katotohanan," aniya.

 

Samantala, tumanggi namang magkomento ni impeachment court presiding officer Senate President Juan Ponce Enrile sa isyu.

 

Ipaliwanag ang dollar accounts

 

Nauna nang inatasan ng Ombudsman si Corona na ipaliwanag ang kanyang $10 milyong halaga ng bank accounts.

 

Kabilang ang $10 milyon sa mga reklamong hiwalay na inihain nina dating Akbayan party-list Rep. Risa Hontiveros, Akbayan Rep. Walden Bello, at Emmanuel Tiu Santos.

 

Paniwala naman ni Corona, act of retaliation lamang ang mga alegasyong inihain laban sa kanya matpos iutos ng Korte Suprema ang pamamahagi ng Hacienda Luisita. — Amanda Fernandez/RSJ, GMA News