Ombudsman, ipinagtanggol ni Angara sa paglahad ng dollar accounts ni Corona

Ipinagtanggol ni Senator Edgardo Angara nitong Miyerkules si Ombudsman Conchita-Morales sa kanyang testimonya sa umano'y 82 dollar bank accounts ni Chief Justice Renato Corona sa siyam na bangko. Ayon kay Angara, hindi na (technically) epektibo ang temporary restraining order (TRO) na inilabas ng Supreme Court (SC) sa umano'y dollar accounts ni Corona. Sa isang panayam, inihayag ni Angara na pumirma ng waiver si Corona sa kanyang statement of assets, liabilities, at net worth (SALN) na nagbigay-daan sa pagbusisi ng kanyang dollar accounts. "So meron ng consent ang depositor na buksan ang kanyang foreign denominated account which is an exception to the absolute confidentiality of foreign exchange deposits," ani Angara. Pinamunuan ni Angara ang pagsusulong ng Law Defining the Powers of the Ombudsman. Iminungkahi rin niya ang pagpapanukala ng Terrorist Financing Suppression Act of 2011. Ayon kay Angara, dahil hiniling ng defense panel ang pagtestigo ng Ombudsman, nagkaroon nang pagkakataon na talakayin sa impeachment proceedings ang mga umano'y mga dokumento sa dollar accounts ni Corona. "Together that combination of facts 'di na kailangan, di na effective yung TRO," ani Angara. Sa paglilitis nitong Lunes, ibinunyag ni Ombudsman Morales ang impormasyon na kanyang nakuha mula sa Anti-Money Laundering Council (AMLC) ukol sa umano'y $12-milyong fresh deposits si Corona sa kanyang 82 accounts sa siyam na bangko. Samantala, kinuwestiyon nina Sentaor Ferdinand Marcos at Miriam Defensor-Santiago ang kapangyarihan ng Ombudsman na kalapin at isapubliko ang mga dukomento sa umano'y dollar accounts ni Corona na walang utos ng korte. Ikinabahala naman ng ilang senador noong Martes na maaaring gamitin ng Ombudsman ang kanyang kapangyarihan upang usigin ang mga kalaban ng administrasyon. "In this case I think that concern is probably already answered or easily answered in this particular case," ani Angara. Naksaad sa Section 8 ng Republic Act 6426 o ang Foreign Currency Deposit Act na: "All foreign currency deposits... are hereby declared as and considered of an absolutely confidential nature and, except upon the written permission of the depositor, in no instance shall foreign currency deposits be examined, inquired or looked into by any person, government official, bureau or office whether judicial or administrative or legislative, or any other entity whether public or private." Ginamit na basehan ng SC TRO ang probisyong ito upang pigilan ng impeachment court na buksan ang umano'y dollar accounts ng punong mahistrado. Sinunod ng Senado ang inihaing TRO. — Amanda Fernandez /LBG, GMA News