Kwentong Kapuso: Para sa kaarawan ng aking Nanay

Published May 28, 2012 4:40pm

Add GMA on Google

Sa'yong kaarawan, aking tanging alay

Ay taos pusong pagbati, kalakip ang pagmamahal

At araw ng iyong dakilang pagsilang

Ay habang buhay kong pasasalamatan

Dakila mong pagmamahal, aming natalos

Simula nuong kami'y mga bata pang musmos

Pag aaruga at oras ibinigay mo sa amin ng lubos

Kahit na nga minsan sa pera tayo ay kapos.

Hirap ng buhay ay hindi mo alintana

Basta kaming mga anak mo ay lumaki ng tama

At iyo ngang ipinakita ay ibayong sipag at tyaga

Di man tayo yumaman, may konting ginhawa.

Pag aaral namin ay sakripisyo mo nuon

Dahil madalas ay walang pang-tuition

Ngunit sa tuwinay nagagawan mo ng solusyon

Kaya naman walong anak mo'y professional ngayon.

Ang buong maghapon mo ay wala ng pahinga

Sa mga gawaing bahay, paglilinis at paglalaba

Ngunit sa hanap buhay ay tumutulong ka pa

Para kahit konti ay may dagdag kita.

Gumagawa ka nuon ng suman at tamalis

Nagluwas ng lambanog at minatamis

Nag angkat ng prutas , pinya at atis

At pahinga mo na'y, mananahi pang gwantes.

Ang iyong tabliya na sadyang masarap

Pati ang atsarang maging laywan ay hanap

Ang gumawa ng mga ito’y hindi biro at mahirap

Sa’yo ay bale wala, may ngiti pang sangkap.

Sa mga tindahan , itlog iyong inirarasyon

Ngunit minsan ay nabasag ko ang isang kahon

At iyo pang nagawang leche flan iyon

Pinakinabangan pa at hindi natapon.

Mga halimbawa mong aming natutuhan

Na ang taong masipag , madaming paraan

At yaong mga tamad na lagi ng may dahilan

Sa agos ng buhay ay napag-iiwanan.

Sa mga anak mo ay dakila kang ina

Kay tatay nama'y butihin kang asawa

Sa Dios ay sadyang may takot ka

Kayat sa San Juan tayo'y napiling isa

Sa sampung natatanging pamilya.

Kadakilaan mo ay hindi ko kayang pantayan

At sabihin pa nga ay hindi kayang mahigitan

Pangarap ko na lamang ay aking matularan

At ipagpatuloy iyong sinimulan.

Sa'yo Inay, maligayang maligayang ika-80 na kaarawan

At sa Dios aking dasal, mabuhay ka ng higit pa sa isangdaan.... Isinulat ni: Laurelio Magpantay para sa kanyang ina — Gng. Lagrimas Magpantay — na magdiriwang ng kanyang ika-80 kaarawan sa Hulyo 18, 2012.

Tags: kwentongkapuso