Tiniyak ng Philippine Health Insurance Corporation (PhilHealth) na patuloy na pagbubutihin nila ang serbisyo sa mga miyembro, kasunod na rin ng planong pagtataas sa premium ng mga overseas Filipino workers (OFWs).

Sa kasalukuyan, umaabot sa P1,200 ang singil sa premium ng mga OFWs bawat taon, o katumbas ng P3.50 bawat araw.

Ang pahayag ay ginawa ng Philhealth sa harap ng mga negatibong komento tungkol sa planong gawing P2,400 ang singil na premium ng mga OFW.

Kumakalat ngayon sa mga social networking site, partikular sa mga fan page ng iba’t ibang OFW group sa Facebook ang pagkontra sa gagawing pagtaas sa singil sa Philhealth.

Sa isang pahayag nitong Miyerkules, sinabi ni Dr. Eduardo Banzon, Philhealth president and chief executive officer, na higit nilang palalawakin ang serbisyong pangkalusugan sa mga OFW at miyembro ng kanilang pamilya.

“The required annual contribution stays at P1,200 this year, or less than P3.50 per day, with respect to OFWs. Their adjusted premium of less than P7 daily, or P2,400 per annum, won’t take effect until January next year," ayon kay Banzon.

“We are building up our capacity to provide greater value for money to our members – our customers, including OFWs. We are constantly enriching benefits and enhancing services," dagdag pa niya sa pahayag.

Patuloy na umaasa si Banzon na dadami pa ang mahihikayat nilang OFWs na maging miyembro lalo na ang mga nagtatrabaho na sa labas ng bansa.

Makakakuha rin umano ng 50 percent discount ang mga miyembro na indibidwal na nagbabayad kung babayaran na nila ngayon ang buong premium para sa 2012 at 2013 bago sumapit ang katapusan ng Hunyo.

“Instead of shelling out P1,200 and P2,400 for their 2012 and 2013 annual premiums respectively, or a total of P3,600, they may pay only P2,400 on or before June 30, and they will be fully covered up to December 31, 2013," paliwanag niya.

Hinikayat din niya ang mga OFW na bayaran ang kanilang premiums sa buong duration ng kanilang job contract sa abroad.

“This way, the OFW and his or her dependents will have peace of mind. They will be protected the whole time the principal Philhealth member or family head is abroad," ayon sa opisyal.

Sa kasalukuyan, umaabot umano sa 2.52 milyon OFWs at 2.48 milyong miyembro ng kanilang pamilya ang sakop ng Philhealth.

“Whether the contribution is P3.50 or P7 per day, this is really nothing much, considering that OFWs are essentially hedging themselves against unforeseen financial costs associated with sudden sickness in the family," ayon kay Banzon.

“The amount represents a fairly small investment meant to guarantee the OFW and his or her dependents ample financial relief in the event of any ailment in the household, or even a wife’s hospitalization due to childbirth," dagdag niya.

Katuwang umano ang Philhealth sa pagbabayad ng pasyente sa room and board, drugs and medicines, laboratory exams, pati na sa operating room at professional fees sa hospital confinements na higit sa 24 oras.

Pasok na mga dependent sa Philhealth ang legal na asawa ng OFW;  mga anak na hindi hihigit sa 21 taong gulang, wala pang asawa at trabaho; at kanilang magulang na higit sa 60 na ang edad. - FRJ, GMA News