3 Pinoy, sangkot umano sa money laundering case sa Thailand ng isang grupong kumita ng P400-M

Tatlong Pilipino ang kasama umano sa isang grupo na nasasangkot sa isang malawakang money laundering case sa Thailand. Sa GMA News 24 Oras Weekend nitong Sabado, sinabi sa ulat ni Tina Panganiban-Perez, na bukod sa tatlong Pinoy, miyembro umano ng grupo ang anim na British national, dalawang Amerikano, isang German, dalawang Romanian, at isang South African. Nasakote raw ng mga awtoridad ang grupo sa tinutuluyang nilang apartment sa Bangkok, Thailand na naging sentro ng kanilang operasyon. Nagagawa raw makapanghikayat ng grupo ng mga investors sa pamamagitan ng telepono. Sa pangakong 65 percent na tubo sa isang short term investment, nakapambibiktima umano ang grupo mula sa Amerika, Europe at South Africa. Sa ulat ng Reuters, nakukuha raw ng grupo ang contact number mula sa mga survey at marketing company. Bago nasakote, tinataya ng awtoridad sa Thailand na kumita na ang grupo ng halagang katumbas ng P400 milyon. Makikipag-ugnayan din umano ang awtoridad ng Thailand sa mga bansang pinagmulan ng mga suspek, kabilang na ang Pilipinas. - FRJ, GMA News