Iniutos na Office of the Ombudsman nitong Miyerkules ang paghahain ng kasong graft laban kay Zamboanga del Sur Rep. Aurora Enerio-Cerilles sa Sandiganbayan.

Ito ay bunsod ng umano’y sobrang pagsingil sa mga medical supply na binili noong 2001 na umabot ng halos P7 milyon.

Napag-alaman sa inilabas na ulat ng Commission on Audit (COA) na nagmula ang P6.879 milyong halaga ng medical supplies sa U-Net Distributors Corporation.

Sinasabing may iregularidad sa naging transaksyon kaya iniutos ni Ombudsman Conchita Carpio-Morales na isampa ang kaso sa anti-graft court laban sa kongresista na lumabag umano sa Anti-Graft and Corrupt Practices Act.

Ayon sa Ombudsman, hindi sinunod ni Cerilles ang procurement procedure sa naturang transaksiyon. Kung sinunod ang proseso at naisagawa ang bidding, maaari umanong nakatipid ang pamahalaan ng mahigit P1.204 milyon.

“There is reason to believe that [they] had unlawfully allowed the direct purchase of medicine supplies from U-Net Distributors Corporation despite knowing that the situation does not call for such kind of purchase and notwithstanding that the documents supporting the identity of the said distributor as an exclusive distributor are questionable," paliwanag ng Ombudsman.

Sinubukan ng GMA News Online na kunin ang panig ni Cerilles. Pero ayon sa kanyang tauhan na si Margie Bancoro, sa susunod na linggo pa maglalabas ng pahayag ang mambabatas.

Kasama sa mga kinasuhan ay sina Marina Tudio-Tampus, dating provincial accountant officer-in-charge (OIC); Estita Tago, OIC provincial budget officer; Malaya Ysmael, OIC general services officer; Corazon Silla-Ariosa, pinuno ng Zamboanga del Sur Provincial Hospital.

Ang mga nabanggit ay pawang miyembro ng Bids and Awards committee ng lalawigan.

Kinasuhan din ang mga pribadong indibidwal na sina Rey Morgada at Neil Cruz, ng U-Net Distributors, na nakakuha sa nasabing supply contract. -- Mandy Fernandez/FRJ, GMA News