MMDA, nagbabala vs 'Bukas-Kotse' gang sa Makati City

Umatake na naman ang mga tinatawag na "Bukas Kotse" kids na target ang mga motorista sa Epifanio delos Santos Avenue (EDSA). Sa Twitter account nito, nagbabala si Metropolitan Manila Development Authority (MMDA) traffic discipline unit head Yves Gonzalez laban sa mga "Bukas Kotse" kids matapos makatanggap sila ng ulat tungkol dito sa Guadalupe Area sa Makati City. Pinayuhan na ni Gonzalez ang mga motorista na panatilihing naka-lock ang mga sasakyan nila. “Looks like the ‘Bukas Kotse’ kids at EDSA Guadalupe are back. We’re on the lookout using men and closed-circuit televisions (CCTVs) but (we remind you) to lock your doors,” ayon kay Gonzalez. Sa parehong Twitter account, dinetalye ni Gonzalez ang modus operandi ng mga batang kawatan: “They open car doors, then grab what they can from all sides while (the) driver is distracted chasing them away. Ang target taxis,” sabi niya. Dagdag niya, karaniwan daw na mga taxi ang binibiktima ng mga nasabing mga bata. Pagsisiguro naman ni Gonzalez, gagamitin ng MMDA ang CCTV cameras sa kalsada upang masawata ang mga miyembro ng mga Bukas-Kotse gang. — LBG, GMA News