Inaasahang darating sa bansa mula sa Syria ang 32 Overseas Filipino Workers na nagpasyang umuwi dahil sa kaguluhan doon.

Ayon kay Overseas Workers' Welfare Administration (OWWA) Administrator Carmelita Dimzon, darating sa Lunes ang mga OFW lulan ng dalawang flights.

Sa ulat ni Mao dela Cruz ng dzBB, sinabi rin ni Dimzon na ang 1st batch na 16 OFWs ay darating sakay ng Emirates Airways' Flight AK332, na inaasahang lalapag sa Ninoy Aquino International Airport (NAIA) dakong 4:35 ng hapon.

Samantala, ang 2nd batch ay darating sakay ng Emirates Airways' Flight AK334 at inaasahang lalapag bandang alas-10 ng gabi.

Sinabi din ng administrator ng OWWA na may repatriation teams na rin na nakatalaga sa NAIA upang sasaulbong sa mga OFW at magbigay-tulong tulad ng airport assistance, transportation assistance, temporary shelter, psycho-social counselling, re-integration program at ang tinatawag na one-time financial grant sa halagang P10,000. Ito ay para sa OWWA members  lamang. — LBG, GMA News