Ang 100-taon at 8 buwang Filipino na si Manuel Antonio Rodriguez, Sr., ang naging pinakamatandang overeseas absentee voter (OAV) matapos niyang magparehistro sa San Francisco noong ika-23 ng Agosto.

Ayon sa isang artikulo sa Department of Foreign Affairs (DFA) website, itinaon ni Rodriguez ang kanyang pagparehistro bilang OAV sa araw kung kailan inilunsad din niya ang kanyang coffee table book, bilang selebrasyon na rin sa kanyang 100 taong edad.

Kilala si Rodriguez sa tawag na "Mang Maning," at kilala din siya bilang pioneer artist sa larangan ng "printmaking" sa Pilipinas.

Naka-base na ngayon sa Amerika si Rodriguez.

Patuloy na hinihikayat ng DFA ang mga Pinoy at ang may dual citizenship na may edad 18 pataas na magparehistro bilang OAV para maka-boto sila sa darating ng 2013 elections sa Pilipinas.

"It is important that we remind Kababayans at every opportunity to take part in shaping the future of our country. Registering for overseas absentee voting will give them the capability to exercise their right to vote and help chart the political future of the Philippines," ayon kay Philippine Consul General sa San Francisco na si Marciano Paynor. — LBG, GMA News