Sa gitna ng girian sa mga pinag-aagawang teritoryo, iminungkahi ng isang mambabatas sa Department of Tourism (DOT) nitong Martes na gawing tourist destination ng Pilipinas ang Spratly islands.

Ang mungkahi ay ginawa ni Cagayan de Oro Rep. Rufus Rodriguez sa plenary debate tungkol sa ilalaang pondo sa DOT sa susunod na taon.

“Let’s take a slice of the DOT budget to put up a good airport and build a good port. Put up a hotel, and develop our frontier in our area as a tourist destination. The seas there are very pristine," ayon sa kongresista.

Ayon kay Rodriguez, dapat payagan ang mga lokal at dayuhang turista na pumunta sa mga pinag-aagawang isla dahil bahagi ito ng teritoryo ng bansa.



Dagdag niya, mapapalakas ang pag-angkin ng Pilipinas sa mga pinag-aagawang isla kapag nagawa itong tourist destination ng bansa.

“Hindi ba, you’ve read in the papers, all the way from China, ginagawang tourist destination ito ng mga Chinese? Tayo malapit lang, e ‘di gawin din nating tourist destination. Huwag tayong magpapatalo roon," aniya.

Nitong weekend, inilabas ng Chinese state media ang plano ng southern Chinese province ng Hainan na isama ang pinag-aagawang Spratlys Islands sa kanilang cruise route.

Matatagpuan ang ilang mahahalagang shipping lanes sa Spratly Islands na pinaniniwalaang mayaman sa mineral deposit, ang West Philippine Sea (kilala rin bilang South China Sea).

Bukod sa Pilipinas, ang mga isla ay inaangkin din ng China, Taiwan, Brunei, Malaysia, at Vietnam.

Nasa pangulo ang desisyon

Ayon naman kay Tourism Secretary Ramon Jimenez, nais muna niyang makuha ang direktiba mula kay Pangulong Benigno Aquino III bago desisyunan kung dapat gawing tourist destination ng Pilipinas ang Spratlys.

“The area in question is now under direct control of the President of the Philippines. We will take our cue from him… Mag-swimming ka lang dun kailangang magpaalam, ganun kaselan ang lugar na iyon," paliwanag ni Jimenez.

Dagdag niya, wala pang plano ang DOT na gawing tourist spot ang pinag-aagawang lugar.

Sa kabila nito, handa umano si Rodriguez na maglaan ng bahagi ng kanyang pondo sa Priority Development Assistance Fund (PDAF) para matuloy ang proyekto.

Plano din umano niyang sulatan si Aquino tungkol sa mungkahi niyang gawing tourist destination ang Spratlys. - Mandy Fernandez/FRJ, GMA News