Enrile, nagtalaga ng OIC sa Senate secretariat

Matapos ang bangayan sa Senado, nagtalaga si Senate President Juan Ponce Enrile ng pansamantalang mamumuno sa secretariat ng kapulungan. Kinumpirma ng Office of the Senate President sa GMA News Online nitong Martes na itinalaga ni Enrile si Deputy Secretary for Legislation Edwin Bellen bilang officer in charge (OIC) ng Senate secretariat. Ginawa ni Enrile ang paghirang kay Bellen matapos mag-leave si Senate secretary Atty. Emma Lirio-Reyes. Sa website ng Senado, nakasaad na trabaho ng Senate secretary ay, "assists the Senate President in extending adequate and timely legislative and administrative support to the offices of Senators." Idinagdag pa na tungkulin din ng Senate secretary na, "exercises supervision and control over all the offices of the service units and officers and employees of the Secretariat. He formulates plans, policies and programs aimed at professionalizing the institution." Noong nakaraang buwan, pinuna ng dating chief of staff ni Enrile na si Gigi Reyes si Lirio-Reyes dahil sa hindi umano nito pagtanggol sa Senate president sa gitna ng kontrobersiya tungkol sa pondo ng Senado. "What? Even the Senate Secretary who serves under and at the pleasure of the Senate President was hesitant to set the record straight and confront the issue, fearing that she would be perceived as defending the Senate President?" puna ni Reyes sa isang pahayag. Nang tanungin ng GMA News Online si Lirio-Reyes kung sadyang pinalitan na siya ni Enrile, iminungkahi niya na humingi na lamang ng kopya ng Special Order mula sa Senate Archives o sa Deputy Secretary. Gayunpaman, hindi inilabas ang kopya ng direktiba dahil itinuturing umano itong internal document. Naghihirang ng mga bagong opisyal ng Senado kapag may sesyon ang Kongreso. Kasalukuyang nakabakasyon ang kapulungan hanggang sa Hunyo. - Mandy Fernandez/FRJ, GMA News