Shakey’s V League, mapapanood sa GMA News TV at GMA News TV International.

Mapapanood ang ika-10 season ng Shakey’s V League, isa sa mga pinaka-tinututukang women’s volleyball tournament sa bansa, sa GMA News TV at sa international channel nito na GMA News TV International.

 

Simula ika-15 ng Abril, isasahimpapawid ng GMA News TV ang mga maiinit na tapatan ng mga kasaling kolehiyo sa nasabing conference mula Lunes hanggang Sabado pagkatapos ng Balitanghali, at simula ika-20 ng Abril sa GMA News TV International.

 

Ito ang unang pagkakataon na ipapalabas sa GMA News TV ang Shakey’s V League samantalang ang dalawang nakalipas na seasons nito ay ipinalabas sa international channels ng GMA na GMA Life TV at GMA Pinoy TV.

 

Muling pinagtibay ng GMA ang kanilang kasunduan sa Shakey’s V League sa isang contract signing na ginanap noong ika-11 ng Abril sa GMA Network Center. Pinamunuan ito nina GMA Chairman & CEO Atty. Felipe L. Gozon, President & COO Gilberto R. Duavit, Jr., Sports Vision Management Group President Richard “Ricky” N. Palou, at Sports Vision Management Group Chairman Moying Martelino.

 

Naroon din sina GMA Vice President and Head of International Operations Joseph T. Francia, GMA Vice President for Regional TV/Expansion & Production Services Rikki O. Escudero, GMA Sports and Special Projects Manager Marivic D. Araneta, GMA International Programming Head Cheri Domingo, Sports Vision Management Group Director Chito Loyzaga at mga manlalaro ng Ateneo de Manila University (ADMU) na sina Alyssa Valdez, Fille Cainglet, at Rachel Anne Daquis.

 

Kalahok din ngayong season ang Adamson University, Arellano University, De La Salle- Dasmarinas, Letran College, National University, San Sebastian College, University of Perpetual Help, University of San Carlos Cebu at University of Santo Tomas.