Mga lider ng Kamara, nagdalamhati sa pagpanaw ng kasamahan

Pakiramay ang mga lider ng Kamara de Representantes sa mga naulila ni Camiguin Rep. Pedro Romualdo na pumanaw nitong Miyerkules, isang araw matapos ding bawian ng buhay ang dating kongresista ng Sorsogon na si Jose Solis. Sa isang pahayag, sinabi ni Speaker Feliciano Belmonte na maituturing ikalawang tahanan na ni Romualdo ang Kamara dahil sa mahabang panahon nitong pagsisilbi bilang kongresista na nagsimula noong 1987. "The House of Representatives has been like a second home to Congressman Romualdo, having served here from 1987 to this day. The years he had been away from the House -- 1998 to 2007 -- was still spent in service to his constituents, as Governor of Camiguin," paggunita ni Belmonte. Binawian ng buhay si Romualdo, 77-anyos, sa Makati Medical Center dahil sa sakit na pneumonia. "Surely his statesmanship and wit will be missed at the plenary hall and in the various committees where he maintained an active presence -- particularly at the Committee on Justice where he served as vice chairman," dagdag ng lider ng Kamara. Nagpaabot din ng pakikiramay sa mga naulila ng kinatawan ng Camiguin si House Deputy Minority Leader Rep. Ferdinand Martin Romualdez (Leyte). Ilan sa mga panukalang batas na inihain ni Romualdo sa Kamara ay ang  Philippine Immigration Act of 2010; An Act Establishing the Mindanao Railway System; An Act Upholding the Constitutional Rights of the People to Information on Matters of Public Concern; at An Act Establishing a Filipino Identification System. Nitong Martes, binawian din ng buhay sa Estevez Memorial Hospital sa Legazpi City si dating Sorsogon Rep. Jose Solis, 80-anyos. Tumatakbo ngayong halalan si Solis bilang kongresista ng Sorsogon. Noong nakaraang 2010 elections, matalo siya kay Raul Lee sa posisyon ng pagka- gobernador ng lalawigan. Nauna nang sumailalim sa heart bypass operation si Solis noong 2011, na kilala ring kaalyado ni dating Pangulong Gloria Macapagal-Arroyo sa Kamara. - RP/FRJ, GMA News