Malaking pating, nalambat sa Guimbal, Iloilo

Isang malaking pating ang sinasabing sumabit sa lambat ng isang mangingisda sa Guimbal, Iloilo. Sa ulat ng Balita Pilipinas Ngayon ng GMA News TV, sinabing nagtaka ang mangingisda nang mapansin nito na lubhang mabigat ang nahuling isda sa kanyang lambat. Nang iahon ang lambat, dito na nakita ang patay na pating na napag-alaman na isang uri ng Tiger shark. May sugat ito sa buntot at posible umanong naubusan ng oxygen at hindi na nakahinga nang maipit sa lambat. Dinala ang patay na pating sa Southeast Asian Fisheries Center upang maipreserba para sa isang museum. -- FRJ, GMA News