Hikut sa oil recovery magpadayon

Pagkatapos sang 10 ka adlaw, isa na gid man sa 10 ka mga tangke sang naglugdang nga Mt Solar I sa kadagatan sang Guimaras ang natsekyar sang Oil Recovery Team. Duha ka adlaw antes nagsugod ang operasyon, gin-alerto na ang tanan nga mga ahensya sa idalom sang Department of Environment and Natural Resources Region 6. Luyag kuno sang DENR mapasiguro nga wala sang magalapta nga langis sa kadagatan sang Guimaras bangud sa oil recovery operation agud indi madugangan ang polusyon kag iban pa nga halit sa kadagatan. Wala kuno untat ang pagbantay sang DENR sa oil recovery operations. Tuman kuno ka hugot ang ginahimo sini nga koordinasyon sa iban pa nga mga ahensya. Masunod nga pagatsekyaron ang nabilin pa gid nga mga tangke sa naglugdang nga barko. Ginalantaw sang DENR nga magadugay pa anga oplan oro. Ini kuno bangud sa rason nga nagalab-ot sa tubtub apat ukon lima ka adlaw ang pagsaylo sang langis gikan sa tagsa ka tangke sa idalom sang tubig pakadto sa iso tanks. Dugang pa gid nga pagpanghanda ang ginhambalan sa meeting sang mga opisyal sang nagkalain-lain nga ahensya sa pagpanguna sang DENR. -Ratsada