Kaso bangod sang oil spill ginbasura

Ginbasura sang Guimaras provincial prosecutors office ang mga kaso kriminal nga ginpasaka sang banwa sang Nueva Valencia Guimaras. Ini amo an mga kasong pagviolar sang Clear Water Aact, Clean Air Act, kag sang Solid Waste Management Act batok sa Petron kag Sunshine Maritime Corporation, ang tag-iya sang Mt. Solar-I nga nagakarga sang bunker oil sang Petron nga nalunod sa baybayon sang Guimaras sang Agosto 11, 2006. Sa resolution ni chief provincial persecutor Luzermindo Calmorin, ang pagkalunod sang Mt solar-I nga gintuna-an sang oil spill sa Guimaras ang indi hungod okun gintuyo kag ang natabu ang isa lang ka aksedente, rason nga ang mga mataga-as nga opisyal sang Petron kag Sunshine Maritime Development Corporation ang wala sang liabilidad kag gina-dismiss ang kaso kriminal batuk sa ila. Sa kasong violation sang Clean Water Act, wala kuno sang record okun alegasyon man ang tagreklamo nga ang barko ang hungod nga ginpalunod rason sang paglapta sang bunker fuel. Sa kasong violation sang Solid Waste Management Act ang ginatudlo sang tagreklamo nga lugar sa diin ginlubong kuno ang oil debris ang barangay San Antonio, Nueva Valencia, ang wala sang kamatu-uran bangud ginhimo lang ini nga transshipment okun temporaryo nga bulutangan sang oil debris. Sa bahin sang pagviolar sang Clean Air Act suno sa tagreklamo naga-spray kon gab-i ang Petron Corporation sang wala nahibaluan nga chemicals, kag ang pagkapatay sang isa ka Remelo mabaling ini tungod sa chemicals nga gin-spray. Suno sa prosecutor, wala na establisar sang tagreklamo ang klase sang chemicals nga gingamit sa pag-spray. Ang pagkapatay kuno ni Remelo mabaling ang tuga sang cardio-pulmonary arrest. Dugang sang fiscal, ang Department of Environment and Natural Resources, sa rekomindasyon sang pollution adjudication board, amo ang otorisado nga makapasaka sang kaso kriminal kag makaimponer sang penalidad sa Petron kag Sunshine Maritime Development Corporation. -Ratsada