Kabayaran sa halit sang oil spill nabaton

Tuman ka haba ang pila sang mga pumuluyo nga nagagawad sang sedula, na isa sa mga rekisitos agud makuha ang tseke nagikan sa International Oil Pollution Compensation Fund (IOPCF) bilang kabayaran sang halit nga dala sang nagluntad nga oil spill sang tinalikdan nga Agosto onse tuig 2006. Masobra sa dos punto siete milyones pesos ang gin-alokar sang IOPCF para sa 819 nga mga claimant nga ila gin-aprobahan. Nagikan sa siyam ka mga barangay sa palibot sang syudad sa Iloilo ang mga claimant. Ini ang ginalakipan sang kabarangayan sang Calaparan, Sto Niño Sur, Sto. Niño Norte kag So-oc sa Arevalo, Calumpang, San pedro kag South San Jose sa distrito sang Molo, Ingore sa distrito sang Lapaz kag Rizal, Palapala Dos sa city proper. Mas manubo ang kantidad nga ginahatag sa apektado nga residente diri sa syudad kon ikumparar sa claimants sa probinsya sang Guimaras. Pinakamataas diri ang masobra P6,000, pinakamanubo naman ang masobra P1,000 depende sa halit nga gintuga sang naula nga langis. Baliskad sa pagpati sang mga residente sang probinsya sang Guimaras nga tuman ka kulang ang ginhatag sang IOPCF bilang kabayaran sa halit nga gintuga sang nagluntad nga oil spill, kontento naman ang mga taga syudad sang iloilo. Matapos ang kapin walo ka bulan, ginkalipay ni Lito Lacson ang iya nabaton nga kapin P2, 400. Si Federico Escamos, isa ka fish vendor kag nagapanag-iya sang bangka nga de layag nga gingamit sa iya pagpangisda, ginkalipay na sini ang P3, 614 nga iya nabaton. Sa karon nga ginapatigayon na ang oil recovery operation agud makuha ang nabilin nga langis sa napulo ka mga tangke sa naglugdang nga Mt Solar 1, balik pangisda na kuno ang mga apektado diri sa syudad. Antes kuno nagbalik sa pagpangisda ang mga apektado nga residente, nagpamanday anay kag nagbiyahe sang traysikad sanday Federico kag Lito. -Ratsada