GMA News Online
Ulat Filipino
»
Iloilo

Inagurasyon sang Iloilo Airport Apr 16

April 11, 2007 6:59pm

Masakรน sa gihapon ang kontraktor kaupod sa pila na gid lamang ka mga trabahante sa finishing touches, isa ka semana antes ang inagurasyon sang bag-ong hi-tech nga Iloilo Airport.

Paga-inagurahan ang airport sa maabot nga Abril 16 kag ini ang pagapangunahan mismo ni Presidente Gloria Arroyo. Ginalauman naman nga magabukas para sa commercial flights ang new airport sa maabot nga Abril 23.

Prayoridad ang pagpinta sa makit-an nga mga gasgas. Padayon ang pagtinlo kag pagpatahum sang palibot, ini bangud sa pagsunod sang standard sa pungsod Japan.

Plastado naman ang teknikal nga aspeto sang operation. Nagasiliga na ang tanan nga mga suga, pati ang mga makinarya sa sulod sang tatlo ka panalgan nga building sang airport.

May yara man sang automatic system nga magapasiguro nga sa sulod sang tres segundos, mapabalik sa normal ang supply sang kuryente sa tion magluntad ang power interruption.

Mahimo naman nga magamit sa paghugpa sang eroplano ang 2.5-kilometer nga runway, mas malapad kon ikumparar sa runway sang Mandurriao Airport.

Preparado na pati ang fire-safety equipment nga himo pa kuno sa Italy ang tatlo ka mga fire truck nga pagagamiton sa oras sang emerhensya.

PAGAHULATON SA NEW AIRPORT

Gilauman nga mas matawhay kag mas komportable nga biyahe, ini ang impresyon nga makita sa una nga tulok sa sulod sang bag-o nga airport sa banwa sang Cabatuan, Iloilo. Mas organisado man kuno ini kon ipaanggid sa airport sa Mandurriao.

Mas malapad ang lugar sini para sa mga maga-gawad sang ticket. Apat tanan ka x-ray machines ang magasala sa bagahe nga igakarga sa tagsa ka flight.

Matapos mag-check in, deretso na sa ikatatlo nga panalgan sang building ang mga pasahero sa diin nahamtang ang pre-departure area. Hagdanan kag escalator ang mahimo nila paga gamiton. Isa naman ka elevator para sa mga VIP.

Ang isa pa gid ka elevator ang gina-aman para sa mga pasahero nga may deperensya sa lawas ilabi na ang mga nagasakay sa wheel chair.

Indi na kinahanglan maggwa sa building ang mga pasahero para magsakay sa eroplano, kaangay sang kinaandan nga ginahimo sa Mandurriao Airport. may yara sang tatlo ka mga passenger tube ini.

Paga-agyan naman ini sang mga pasahero halin sa pre-departure area padulong sa pagasakyan nga eroplano gani wala na sang magareklamo sang kainit kag wala sang mahimo mabasa sang ulan.

Gikan sa eroplano, gamit sa gihapon ang passenger tube, magaderetso naman sa ikaduha nga panalgan ang mga pasahero nga bag-o nag-abot antes makaderetso sa exit sa diin nahamtang ang car park nga mahimo maka akomodar sang 415 tanan ka mga salakyan. -Ratsada