Petisyon sang
P75 wage increase ginpamati sa RTWPB

Petisyon sang dugang nga P75 nga saka sa adlaw-adlaw nga sweldo liwat ginpamati sang Regional Tripartite Wages and Productivity Board (RTWPB) matapos ang maga-isa ka tuig na nga pagpasaka sang minimum wage sa Western Visayas. Sa maabot nga agosto uno, maga-isa ka tuig na nga ginpasakaan ang minimum wage sang mga mamumugon. Subong P222 ang kalabanan sa sweldo sang mga empleyado sa mga commercial establishment. Apang ini ang ginpamatukan sang management sector. Para sa ila, wala sa tyempo kag makabig abusar ang ini nga kantidad. Pinakataas nga ila kuno mahatag ang P15 increase. Gilayon naman nga ginpabutyag sang representante sang mga mamumugon sa board ang ila disgusto. Pagkatapos sang tanan nga presentasyon nagpasalig ang bag-o nga direktor sang Department of Labor and Employment nga ila pagahatagan sang “win-win" solution ang isyu. RTWPB ginapa-abolish Wala pa man makapresentar ang management kag workers’ sector sang ila nga mga panindugan angut sa ginapangayo nga wage increase, nag-eksena na ang reprsentante sang Bukluran ng Manggagawang Pilipino (BMP). Ginsinggitan sini ang madugay na nga panawagan sang ila grupo. Ang pagdula sang RTWPB. Patal ang mga tinaga nga gin-usar ni Ronald Payda, representate sang BMP, sa atubang sang mga nagabug-os sang board. Bangud sa gamay kuno nga nagarepresentar sa mga mamumugon, indi na patas ang RTWPB sa ila mga rekomendasyon, kag pananglitan may pagtaas gid man kuno sa sweldo pagkatapos sining wage increase petition, tam-an gid ka gamay sang matupa sa mga mamumugon. Sa gihapon ginpangayo sang BMP ang P125 nga saka sa adlaw-adlaw nga sweldo. - Ratsada