21 mga NPA sa Compostela Valley mi-surrender

Nibalik na sa sabakan sa balaod ang 21 ka mga sakop sa Front Committee 34 sa New People’s Army nga naglihok sa probinsya sa Compostela Valley ug Agusan del Sur. Pormal na nga nipadayag sa ilang pag-abin sa gobyerno ang 21 ka mga sakop sa NPA, sumala pa ni Lt. Col. Bienvenido Datuin Jr, ang commanding officer sa 28 Infantry Battalion. Dugang pa niya, ang 21 ka mga NPA maoy usa sa pinakadako nga grupo nga nisurender. Matod sa opisyal, dala sa mga surrenderee ang 28 ka mga tag-as nga matang sa armas, busa nagpasalamat ang opisyal sa sundalo gumikan kay nasabtan sa mga rebelde ang maayong katuyuan sa gobyerno. Gibutyag ni William Salimbaun Man-anuhug, usa ka surrenderee, nga wala na sila nalipay sa poder sa mga rebelde. Wala kunoy natuman sa ilang [opisyal sa NPA] mga gipasalig ngadto kanila, inay sila pa hinoon ang gipahimuslan. Nipahayag ug kaandam si Mayor Rodrigo Duterte, chairman sa regional peace and order council, nga motabang ngadto sa bag-ong nibalik nga mga rebelde sa bisag unsa nga paagi siya gikinahanglan. - Testigo