Utok sa pamomba sa Mindanao nailhan na

Gibutyag ni Tacurong City Police director Senior Supt. Joel Lamson nga nailhan na ang mastermind sa sunud-sunod nga pagpamomba sa Central Mindanao. Nailhan ang giingong mastermind dihang mikanta ang usa ka nadakpang suspek nga si Badrodin Tapid, nga usa kuno lokal nga recruit sa teroristang grupong Jimmaah Islamiyah. Kahinumdumang si Tapid nadakpan sa Tacurong City, diin nabawi gikan kaniya ang unom ka mga improvised nga bomba. Gibutyag niini ang mastermind sa grupo nga ginganlan og Omar Tulia nga naglihok sa North Cotabato ug usa ka Tungan Fatima nga gatago-tago sa Maguindanao. Ang duha sakop kuno ni kumander Basit Usman nga maoy nagbayad kang Tapid sa kantidad nga P200,000 aron ilunsad ang pagpamomba. - Testigo