CEBU CITY, Philippines - Pipila ka mga abogado ug empleyado sa public attorneys office (PAO) misang-at og petisyon pagpalagpot sa regional direktor.

Gipangayo sa mga nagpetisyon ang pagpalagpot kang G-Ree Calinawan tungod, matod pa, naputos karon sa kontrobersiya ang PAO.

Mokabat 15 ka mga abogado ug unom ka mga kawani mipadala’g suwat reklamo direkta sa Malacañang batok kang Calinawan.

Ilang gikwestyon ang giingong pagpasagad og gasto sa pundo sa ahensya nga gitagana sa tibook rehiyon sa Central Visayas.

Ilang gihulagway nga dili maayong leader si Calinawan tungod sa dili maayong pagpadagan sa PAO.

Pasangil nila: madinumtanon, sugarol ug kwestyonable ang moralidad sa direktor.

Gisuwayan unta sa Balitang Bisdak pakighinabi ang mga complainant apan nagdumili sila pagluwat og pamahayag.

Gihimakak ni Calinawan ang tanang mga pasangil batok niya. Nagtoo siya nga posibleng adunay kaligutgot kaniya ang mga complainant.

Nanghinaot ang director nga dili unta maka apekto ang kontrobersiya sa performance sa PAO. - Balitang Bisdak