Tanong ni Mike Enriquez: Ikaw na ba?

January 29 2016

Isa-isang makakapanayam ng batikang broadcast journalist na si Mike Enriquez ang mga kandidato para sa 2016 presidential at vice presidential race sa nagbabalik na election special ng Super Radyo DZBB na Ikaw Na Ba?

Mapapakinggan ang Ikaw Na Ba... The Presidential and Vice Presidential Interviews sa flagship AM station ng GMA mula Lunes hanggang Biyernes, 9 to 10 AM.

Sa bawat episode, sasagutin ng tampok na kandidato ang iba’t ibang katanungang naglalayong pagtibayin ang boto ng bawat Pilipino sa darating na Mayo.

“We want to help our voting public make informed and intelligent choices,” ani Enriquez.

“And as in previous elections, DZBB will be at the forefront of the entire election period, and together with other GMA platforms, mount the most comprehensive, truthful and unbiased coverage possible,” dagdag niya.

Noong 2011, nagwagi ang Ikaw Na Ba… The Presidential Interview bilang Best Education Radio Program sa Catholic Mass Media Awards. Makalipas ang dalawang taon, kinilala rin sa parehong kategorya ang Ikaw Na Ba… The Senatorial Interview.

Ang Ikaw Na Ba… The Presidential and Vice Presidential Interviews ay mapapakinggan sa DZBB 594 KHZ at may simulcast sa lahat ng RGMA stations nationwide.