Sa kabila ng malakas na suporta ng netizens kay Caprice Cayetano at sa ibang loveteam na ipinapartner sa kaniya, aminado ang Pinoy BIg Brother Celebrity Collab Edition 2.0 Big Winner na gusto niya munang pagtuunan ng atensyon ang kaniyang karera at trabaho na dumarating sa kaniya.
Sa Fast Talk with Boy Abunda nitong Lunes, nilinaw naman ni Caprice na hindi naman siya pinagbabawalan ng kaniyang mga magulang na magkaroon ng lovelife at crushes. Ngunit nagbigay naman ang mga ito ng payo sa kaniya.
“Ang advice po na lagi po nilang sinasabi sa 'kin ay i-enjoy ko po 'yung teenage life ko kasi 'yun po 'yung hindi nila na-enjoy before. So lagi po nila akong binabantayan. Pinapayagan naman po nila ako mga happy crush ko, pero with guidance,” sabi ni Caprice.
Sa ngayon, mas gusto umano ng kaniyang mga magulang, at siya mismo, nag pagtuunan na lang muna ng pansin ang kaniyang sarili at ang kaniyang karera.
Tingnan kung ano ang masasabi ni Caprice sa gallery na ito:
Pagbabahagi ni Caprice, pinayuhan siya ng kanyang mga magulang na i-enjoy ang kaniyang teenage life, lalo na at ito ang isang bagay na hindi nila nagawa noon.
Ngunit paglilinaw ng young actress, may tiwala naman ang kaniyang mga magulang sa kaniya at sinabing may guidance ang happy crushes niya.
Sa pagbisita ng PBB Celebrity Collab Edition former housemate Shuvee Etrata sa Bahay ni Kuya, ibinahagi ni Caprice ang ideal guy niya. Ngunit paglilinaw ng aktres sa naturang GMA Afternoon Prime Talk show, ang tinutukoy niya ay ang Daddy niya na si Chef Jorge Mendez. Sabi ni Caprice, "Si Daddy po kasi talaga 'yung naging standard ko po, si Daddy po talaga 'yung dahilan kung bakit mataas po 'yung standards ko.'
Binalikan din ni Boy ang pagiging chef ng ama ni Caprice, at tinanong kung naisip ba ng aktres pasukin ang karerang ito.
Ngunit ayon kay Caprice, imbis na chef, mas gusto niyang maging pastry chef.
Pag-amin ni Caprice, "Gusto ko po ng pastry chef kasi mahilig din po talaga ako sa mga sweets."
Nilinaw din ni Caprice na pangarap niya mismo ito, at hindi siya pinilit lang ng kaniyang daddy. Sa katunayan, nakasuporta lang ito at kaniyang mommy sa lahat ng gusto niya.
Samantala, ibinahagi rin ni Caprice na malapit sila bilang isang pamilya. Sa katunayan, importante ang quality time sa kanilang pamilya.
Inamin din ni Caprice na hindi rin siya madalas gumamit ng gadgets, bagay na ginagawa ng kanilang pamilya. Ito rin ang nakakatulong umano sa kanila para magkaroon ng quality time sa pamilya.
Pagbabahagi ni Caprice, "'Yung quality time namin, dinadaan po namin talaga sa sabay-sabay kumakain, sa mga restos."